Una biera que no fa mal de cabeza

A formula, descubierta por scientificos australianos, anyade electrolitos y conserva o gusto d'a bebida

KONICA MINOLTA DIGITAL CAMERA

Foto: Jordi Coll Costa (CC-BY-SA)

Se podrá convertir a biera en una bebida adequada dimpués de fer esporte? Será posible empifolar-se con bieras sin fer-se-ne d’o mal de cabeza posterior? Istas qüestions se podrían resolver gracias a una nueva formula descubierta por scientificos australianos expertos en nutrición d’o Griffith Health Institute. Se tracta d’una biera rehidratant. A bebida no pierde cuerpo ni gusto, pero, se’n reducen as propiedatz deshidratants que fan que suframos mal de cabeza. O secreto d’a nueva receta ye l’anyadiu d’electrolitos, que convierten a bebida en una mena de ‘Gatorade’, a bebida isotonica que se toma pa rehidratar-se y recuperar carbohidratos.

Pa comprobar a eficacia, l’instituto de salut australiano fació un experimento con siet personas que acababa de fer exercicio fisico. Dimpués d’a perda de liquido provocada por o esporte, les demandó que se tomasen una biera, en quatro ocasions diferents. Dos bieras teneba electrolitos adhibius y dos no.

Os participants heban d’incherir o equivalent a o 150% de masa corporal perdida entre o exercicio fisico, fase que duró una hora. O resultau estió claro: en todas dos ocasions en que bebioron biera con mayor cantidat d’electrolitos s’hidratoron un tercio mas que no quan bebioron biera regular. Antiparte, dengún d’os siet no sintió diferencia en o gusto.

L’obchectivo de l’investigador Ben Desbrow, profesor asociau d’o GHI’s Centre for Health Practice Innovation, yera conservar as propiedatz nutritivas que tien a bebida. Manimenos, ni Desbrow ni o GHI no recomiendan a biera rehidratant dimpués de fer esporte porque no deixa d’estar una bebida alcoholica. Agora bien, qui deseye tomar una biera freda dimpués d’un largo diya de treballo podrá fer-lo sin fer-se-ne tanto d’os risques de deshidratación que comporta.

Fuent: http://www.vilaweb.cat/noticia/4139660/20130821/cervesa-caparra.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.