Una cadena humana de 400 km demanda a independencia de Catalunya

Cientos de mils de personas en una manifestación historica por a independencia de Catalunya

Un d'os trampos d'a cadena (Foto: Vilaweb)

Un d’os trampos d’a cadena (Foto: Vilaweb)

Centenars de millars de personas (1,6 millons, seguntes cifras d’a Generalitat de Catalunya) implioron ahiere a cadena humana, conoixida como Vía Catalana cap a la independència, que s’espardió por 400 km de recorriu, dende El Voló, en l’Estau Francés, dica Vinaroz, en o País Valenciano. Lo feban coincidindo con La Diada, a fiesta nacional de Catalunya, que se celebra l’ontze de setiembre.

En a Plaza Catalunya de Barcelona, Carme Forcadell, presidenta de l’Asambleya Nacional Catalana, remataba l’acto comprometendo-se en nombre de l’Asambleya a “treballar dica que Catalunya siga un nuevo estau d’Europa” y ha tornau a insistir en que a consulta por a independencia se faya en 2014, como ye previsto. “Queremos que l’anyada 2014, o tricentenario d’a nuestra redota, esdevienga a primer anyada d’a nuestra libertat”, declaraba.

Mientres as semanas anteriors a la cadena humana d’iste martes, s’han iu fendo cadenas humanas en a-saber-los municipios de parla catalana. Encara que en Catalunya no bi habió garra problema, tanto en o País Valenciano como en Aragón, as fuerzas de seguridat facioron estorbo identificando y mesmo metendo pinyoras por levar a matricla con o pegallo de CAT. En a branca valenciana d’a cadena bi habió iste martes problemas tamién con a Guardia Civil, estando deteniu y acusau de desobediencia grieu Alfons López Tena, ex-diputau de Solidaritat Catalana per la Independència, quan empachaban pasar a la manifestación.

En Madrit, en a siede d’a Delegación d’o Gubierno catalán, entre que se i feba un acto institucional, una colla de neonazis interrumpió l’acto portiando sinyals d’Espanya y de partius faixistas como Democracia Nacional u Falange Española, y fendo chilos espanyolistas y faixistas. Tamién i chitoron gas pimienta habendo de desaloixar-se parti de l’edificio, estricalloron o mobiliario y facioron bell empentón t’a chent que i yera. Seis d’os quince  autors d’ista acción son estaus detenius, por agora.

Dende o Gubierno espanyol, a suya portavoz Soraya Saenz de Santamaría, ha sacau importancia a ista masiva cadena humana, apelando a “una mayoria silenciosa que s’ha quedau en casa suya“. Politicament contina sin cantiar-se  y ha declarau que o gubierno “charra y dialoga aintro d’a Constitución”.

De man d’o Gubierno catalán, Artur Mas tornó a comprometer-se con a consulta en 2014, dimpués d’as dubdas sembradas por as declaracions d’a semana pasada. Tamién ha quiesto clamar  a las autoridatz espanyolas ta que “ascuiten a voz d’o puevlo de Catalunya y respeten a suya voluntat de decidir o suyo esdevenider”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.