Una colla d’enfermeras d’o Servet fa un Manual sobre Ciruchía en Obstetricia

Ye un libro de pocha que sirve como ferramienta ta consultas rapedas.

portalada

Un equipo d’Enfermería de l’Hespital Universitario Miguel Servet de Zaragoza ha publicau un Manual que replega os quasi trenta procedimientos quirurchicos que desembolican istos profesionals en a demba d’a Ciruchía d’a Obstetricia (cesareas, legraus, absceso de popa, chenitals, cerclaches…). O libro, coordinau por Reyes Fernández González, una d’as enfermeras d’iste equipo, tien como obchectivo servir de refirme a los profesionals que se incorporan t’o servicio y servir de guida de consulta rapeda debant de qualsiquier dubda.

As profesionals ya heban feito unas fuellas esquematicas de muitos d’os procedimientos que se fan diya par d’atro en ista demba. En viyer a buena acullida que teneban, apostoron por enamplar os contenius y temas ta cubrir a más gran parti d’as necesidatz que pueden surtir en desembolicando l’actividat quirurchica de man d’a Enfermería.

Reyes Fernández, profesora asociada d’a Facultat de Sciencias d’a Salut, explica que iste libro permite “disposar d’una ferramienta de consulta util que facilite a practica d’os profesionals aintro d’a demba quirurchica y asinas puyar a calidat asistencial”. Asinas mesmo, a profesional apunta que “a unificación de criterios feita en o libro achique a variabilidat d’os procedimientos quirurchicos en Enfermería, favoreixendo asinas l’emplego correcto d’os recursos”.

A coordinadora destaca que, ta fer iste Manual, i ha participau “una vintena d’enfermeras, antimás d’un anestiesologo y un obstreta, como miembros integrants d’a configuración d’un equipo quirurchico”.

O manual, de grandaria de pocha, ye bien documenta con fotografías y dibuixos feitos de propio, ya que siempre se ha mirau a expresividat grafica como traza de refirmar os textos.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.