Una concentración en Zaragoza demanda a libertat d’os detenius en as Marchas d’a Dignidat

Una responsable de IU, entre as personas detenidas. A policía prencipió as enrestidas antes que no rematase l'acto, comunicau debidament a las autoridatz

Imachen d'a concentración (Foto: Arainfo)

Imachen d’a concentración (Foto: Arainfo)

Iste domingo bells cientos de personas demandoron debant d’a Delegación d’o Gubierno espanyol en Aragón, a libertat sin cargos ta os detenius mientres a nueit d’o sabado en Madrit, en as enrestidas policials que bi habió mientres y dimpués d’as Marchas d’a Dignidat. Una d’as detenidas ye Raquel Tenías, Responsable de Relacions con os movimientos Socials y Ciudadanos de IU Aragón.

As marchas d’a dignidat, que heban traviesau Aragón mientres istas zaguers semanas, plegoron en Madrit o sabado, a on que bi habió una gran manifestación que achuntó a más d’un millón de personas, seguntes calculos basaus en as imachen aereas. Istas marchas heban surtiu de muitos puntos d’a peninsula, levando reivindicacions muito basicas por tot. Dica la nueit d’iste sabado no bi heba habiu garra conflicto.

Antis que no rematase l’acto principal en a Plaza Colón de Madrit, a policía espanyola prencipió a enrestir contra os manifestants, entre que encara se sentiba o Canto a la libertat. Os disturbios posteriors rematoron con buena cosa de ferius, entre ells, una persona que ha perdiu un testiculo por una pelota de goma. Tamién bi habió decenas de detenius. Dende a organización se sinyala dreitament a lo Gubierno espanyol como provocador d’os incidents y d’as enrestidas policials.

L’actuación d’a policía ha estau muito criticada por toda mena de organizacions y colectivos que la han considerau desproporcionada de tot. Tanto por o feito d’haber prencipiau a enrestir antes sisquiá de que rematase a manifestación, como por l’emplego abusivo d’a fuerza, u os tiros de balas de goma, beluns a poca distancia y sin apuntar t’a tierra, como se indica en os reglamentos.

Ahiere se facioron nuevas protestas y asambleyas ta decidir qué estratechias seguir y qué fer dimpués d’istas marchas que han conseguiu movilizar a arrienda chent en tot l’estau, con muitas luitas diferents. En Zaragoza, se demandó a libertat de totz os detenius, en especial de Raquel Tenías, aragonesa y militant de IU. O nuevo calendario de movilizacions se prencipiará a decidir en as venients semanas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.