Una denuncia ubre a vía chudicial contra as autoridatz espanyolas por a trachedia de Ceuta

Os feitos que acaboron con a muerte de mas d'una dotzena de personas son "constitutivos d'infracción penal", seguntes os denunciants

Imachen d'una parte d'a cleta fronteriza en Ceuta. Foto: Xemenendura (C-BY-SA)

Imachen d’una parte d’a cleta fronteriza en Ceuta. Foto: Xemenendura (CC-BY-SA)

Qualques ONG d’esfensa d’os dreitos d’os immigrants han pasau a l’acción. Dimpués d’as muertes de mas d’una decena de personas que pretendeban d’aconseguir territorio espanyol o pasau chueves en Ceuta, una vintena d’asociacions van a presentar iste lunes una denuncia debant d’a Fiscalía Cheneral d’o Estau. En ella, exichen que s’esclareixcan os feitos de l’actuación d’a Guardia Civil en a buega y replega testimonios de supervivients, que incluyen accions “constitutivas d’infracción penal“, seguntes os denunciants.

Os denunciants replegan as declaracions de quantos supervivients, que aseguran que a Guardia Civil actuó con material antidisturbios mientres feban un poder por aconseguir a costa espanyola. Testimonios en os que, amás, aseguran haber estau maltractaus una vegada aconseguiu territorio espanyol.

“Muitas ONG exichimos una investigación d’os feitos ocurrius en Ceuta”, explica l’advogada Patricia Fernández a eldiario.es. “Tot debe estar esclariu, no solament as devoluciones ilegals d’immigrants, os colectivos despreciamos l’uso de material antidisturbios sobre personas que fuyen d’a pobreza y muito mas si yeran en l’augua en una situación de vulnerabilidat total como denuncian qualques testimonios”.

Amás, os colectivos denuncian a opacidat amostrada por o Gubierno sobre iste afer. “A Delegación, luen d’aclarir os feitos, ha creyau mayor confusión en tot momento”, adhibe Fernández, qui detalla que as ONG sinyants tamién exichen que s’aporte toda a información existent sobre a trachedia, incluidas as imachens d’o centro operativo de seguranza.

O pasau chueves un grupo d’amán de 400 personas preboron d’entrar en territorio espanyol a traviés de tres intentos, seguntes a versión oficial. Os dos primers se realizoron en tierra, a traviés d’os pasos fronterizos que connectan Marruecos con Ceuta, an que a Guardia Civil espanyola privó a entrada fendo servir material antidistubios. Posteriorment, un grupo de si fa u no fa 200 personas preboron d’entrar-ie marguinando o espigón fronterizo a nado.

Seguntes Interior, quan se lanzoron t’o mar, as fuerzas de seguranza espanyolas no emplegoron as balas de goma y potes de fumo que sí reconoixen haber usau en os suyos dos primers intentos, alegando una “actitut violenta” d’istas personas. Os testimonios de qualques immigrants replegaus por eldiario.es y a ONG Caminando Fronteras contradicen ista versión. Aseguran que, mientres yeran en l’augua, a Guardia Civil emplegó material antidisturbios.

“A policía marroquí i ha arribau dimpués, a espanyola i yera antes. Os marroquís i plegoron como media hora dimpués. Ye a ‘guardia’ a que s’ha encargau de nusatros”, explicó Aiman. “Han disparau muito. Mas que as atras vegadas. A lo menos entre media hora. Ha pasau tot muit aprisa. Ye a primer vegada que han disparau asinas. A ‘guardia’ disparaba y qualques personas se quedoron inconscients en l’augua. Atros s’han afogau“, explicó Aiman, un d’os supervivients, a eldiario.es.

O testimonio de Louis, unatro d’os immigrants que prebó d’entrar en Ceuta, tamién ye diferent d’a versión oficial de l’ocurriu dimpués d’introducir-se en l’augua. “Nos ha atacau mas a ‘guardia’ que a policía marroquí. Han lanzau pilotas de goma, han punchau pneumaticos a on beluns s’heban amontau y nos ha rociau con gas lacrimocheno. A chent ha empecipiau a tener ataques de niervols”, detalla o camerunés, qui tamién advertiba que encara quedaban calavres en o Mediterranio. “Muitos cuerpos han desapareixiu en o mar”, lamentaba a l’atro costau d’o telefono.

D’a mesma traza, os immigrants denunciaban que un grupo heba aconseguiu alcanzar suelo espanyol pero a Guardia Civil les heba entregau de nuevas a la policía marroquí, una practica ilegal seguntes a Lei d’Extranchería. L’Instituto Armau lo negaba pero as imachens espardidas por un vidio emitiu en La Sexta confirmoron os suyos testimonios. Alavez, a Chendarmería admitió que istas personas heban pisau Ceuta y, posteriorment, heban estau tornaus.

Fuent: http://www.eldiario.es/desalambre/Varias-ONGs-presentan-esclarecer-Ceuta_0_227477388.html

Una rispuesta a Una denuncia ubre a vía chudicial contra as autoridatz espanyolas por a trachedia de Ceuta

  1. Pingback: Una denuncia ubre a vía chudicial contra as autoridatz espanyolas por a trachedia de Ceuta | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.