Una error condena o Zaragoza a perder atra vegada en casa

O Valencia se leva os tres puntos en un partiu de poco fútbol

Un inte d'o partiu Zaragoza-Valencia (Foto: realzaragoza.com)

Un inte d'o partiu Zaragoza-Valencia (Foto: realzaragoza.com)

Partiu igualau en a Romareda que a la fin perdeba o Reyal Zaragoza por una error d’Efraín Juárez. O partiu estio marcau por o rispeto entre os dos equipes, que no s’amanoron a las arias fueras de bella ocasión.

Reyal Zaragoza y Valencia saliban a  campo bien plantaus sobreo mesmo, intentando controlar a pilota y no perder as posicions. Un disparo de Ponzio, y un remate d’o Valencia aturau por Roberto, estioron as dos unicas ocasions en o primer tiempo.

A segunda parti prencipiaba igual, encara que o Zaragoza pareixió fer un trango entazaga. Pero allora plegaba l’inte d’o partiu. Una cesión ta Guaita feba prexinar que o Zaragoza tendria una oportunidat clara, pero la falta indirecta estió de tot, menos eficaz. Luis García paso ta Juárez, que en cuenta de aturar o balón ta que tirés Paredes, lo desplazó enta la pierna dreita de l’esfensa, que ye cucho, malmetiendo a chugada.

Poco dimpués, o mesmo Juárez feba una error grieu en l’aria chicota perdendo a marca de Jordi Alba que batiba a Roberto que tamién fallaba en a salida. Encara que o Reyal Zaragoza tenió atra ocasión no l’aproveitó y o Valencia marchaba con os tres puntos.

Como nota positiva, a la fin se fació l’estreno de Ortí como chugador d’o primer equipe, encara que poco podio fer, fueras de prevocar a cesión ta Guaita que desaproveitó o Zaragoza.

Con iste risultau l’equipe aragonés queda con 9 puntos en o puesto 14, a dos puntos d’os puestos de baixada y a quatro d’os puestos europeyos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.