Una exposición commemora en Alcanyiz os cient anyos d’o descubrimiento de Val del Charco del Agua Amarga

A sala d'exposicions d'Alcanyiz acullirá dica o 21 de chulio una muestra sobre os grupos prehistoricos que habitoron ixa zona

2013-07-09_val-agua-amarga2

Foto: Gubierno d’Aragón

L’abrigo Val del Charco del Agua Amarga, un d’os millors conchuntos d’arte levantino de tot Aragón, ye de cabo d’anyo. Fa cient anyos dende que estase descubierto por o notario de Val d’Algorfa, Carlos Estevan. Pa commemorar iste centenario dica o 21 de chulio a sala d’exposicions municipal d’Alcanyiz aculle una muestra que permite descubrir a vida d’os grupos prehistoricos que creyoron l’Arte Levantino. Tot ixo a traviés de diversas scenas d’a vida diaria prehistorica recreyada por l’ilustrador David Guirao.

A muestra se completa con una gran imachen detallada de l’abrigo y con espacios adedicaus a la historia d’iste descubrimiento. Podrá visitar-se viernes y sabados dica o 21 de chulio, en horario de 19 h. a 21 h. y a entrada ye libre.

A exposición forma parte d’a programación commemorativa d’o centenario d’o chacimiento organizada por a Comarca d’o Baixo Aragón y o Gubierno d’Aragón, con o financiamiento d’o Ministerio d’Educación, Cultura y Esporte y a colaboración d’a Diputación Provincial de Teruel y os concellos d’Alcanyiz y Val d’Algorfa.

Un conchunto rupestre sin barreras arquitectonicas

Paralelament a istas actividatz, s’han feito una serie de treballos d’acondicionamiento de l’entorno de l’abrigo que han serviu pa amillorar a calidat d’as visitas. Istas actuacions las han realizadas a Comarca d’o Baixo Aragón con a colaboración d’a Diputación Provincial de Teruel.

Os treballos han consistiu en l’adequación d’a pista d’acceso y sinyalización, amás s’han substituiu as escaleras d’acceso por una rampa. Isto convierte a Val del Charco del Agua Amarga en l’unico conchunto rupestre adaptau pa la visita de personas con mobilidat reducida. Asinas mesmo, s’ha procediu a o pintau y saniamiento d’os encletaus de protección.

Itinerario Cultural Europeu “Camins d’Arte Rupestre Prehistorico”

L’enclave rupestre de Val del Charco del Agua Amarga ya forma parte de l’Itinerario Cultural Europeu Camins d’Arte Rupestre Prehistorico. Ista distinción ratifica a valor d’istas manifestacions artisticas y d’os entornos naturals en os quals se troban.

Iste Itinerario cuenta con a implicación de mas de trenta institucions publicas y entidatz d’Espanya, Francia, Portugal, Italia, Irlanda, Suecia y Noruega. Os destins seleccionaus pa formar parte de l’Itinerario son aquells que cumplen con una serie de requisitos tals como estau de conservación guaranciau, accesibilidat, facilidat de comprensión y chestión estable (ufierta d’actividatz, visitas guidadas, centros de visitants relacionaus y atros servicios en l’entorno).

Fuent: http://www.cronicadearagon.es/wordpress/?p=42584

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.