Una investigación ubre a puerta a que as parellas homosexuals tiengan os suyos propios fillos biolochicos

Scientificos d'a Universidat de Cambridge ha descubierto que pueden creyar-se ovulos y espermatozoides a partir de celulas d'a piel

Foto: Wikipedia

Foto: Wikipedia

Scientificos d’a Universidat de Cambridge ha descubierto que se pueden creyar celulas d’ovulos y d’espermatozoides de celulas d’a piel. Un abance que si prospera permitirá a parellas homosexuals u con problemas de fertilidat tener fillos biolochicos. Os investigadors a o cargo calculan que, en dos anyos, iste prochecto se podría traducir en os primers vastagos naixius con iste procedimiento.

En iste treballo a novedat que i hai ye que s’aconsiguen fer celulas mais cherminals humanas. Bella cosa que solament s’heba aconseguiu en zorces”, explica Agustín Zapata, Catedratico de Biolochía Celular d’a Universidat Complutense. “A partir d’istas celulas se pueden obtener espermatozoides u ovulos funcionals y ixo se puede aplicar a personas que tienen problemas de reproducción. Belún que no tien espermatozoides, gracias a iste metodo podría aconseguir tener-los, y con una inseminación in vitro podría tener un borche”.

Os investigadors d’o estudeo financiau por a Fundación Wellcome Trust, desenrollau en Cambridge y que conta con o emparo de l’Instituto israelí de Sciencias Weizmann, han declarau a The Sunday Times que iste primer trango d’o prochecto yera o mas important. “Hemos contrimostrau que se pueden creyar ixas celulas tempranas en un laboratorio”, explica Amin Surani, director d’o prochecto y Catedratico de Fisiolochía y Reproducción d’a universidat britanica.

Un abance novedoso, a o que suman unatro progreso ya que tamién han aconseguiu que en ixas nuevas celulas mai creyadas se corrichan os problemas que provoca o paso d’os anyos. “Hemos descubierto que en istas nuevas celulas desapareixen as alteracions que se producen quan os teixius van madurando“, contina sinyalando en o diario britanico o lider d’o prochecto, que tamién participó en a investigación que dio puesto a la naixencia de Louise Brown en 1978, o primer borche probeta d’o mundo.

Os expiertos consideran que l’abance aconseguiu por o equipo de Surani ye un exito, encara que sinyalan que o plazo que aportan dende a Universidat de Cambridge ye orientativo. Por un costau, Joaquín de Juan Herrero, Catedratico de Biolochía Molecular d’a Universidat d’Alicant, indica que ixe periodo de dos anyos se puede alterar ya que a implantación d’ista investigación no depende solament de factors scientificos: “Os condicionamientos eticos de cada país son os primers elementos a tener en cuenta. Tamién pende que os experimentos vaigan bien. De feito, iste se podría realizar ya, o problema ye meter a punto as tecnicas porque no se conoixen as conseqüencias de producir un embrión con istas celulas nuevas“.

Ixe ye un d’os reparos que se troba o equipo de Surani, antes de prencipiar a desenrollar ista nueva traza de reproducción deben confirmar que as celulas fabricadas no tienen alteracions porque alavez se chenerarían embrions sin viabilidat u con malformacions.

Por atro costau, dende l’Observatorio de Bioetica y Dreito d’a Universidat de Barcelona piden prudencia. A suya directora, María Casado, sinyala que iste prochecto se troba en una fase inicial: “Falta muito ta que sía disponible en a reproducción asistida“, asegura, y creye que no cal dar por feito a suya implantación ya que puede creyar “falsas expectativas” entre a población beneficiaria.

Unatra d’as interpretacions d’iste estudeo que cal tener en cuenta, seguntes Agustín Zapata, ye que no se precisa que os donants de celulas sían dos personas diferents. Si o prochecto sale ta debant se podrían chenerar embrions fendo servir teixiu d’una sola persona: “Con una celula d’a mía piel yo puedo fer espermatozoides míos y ovulos míos. Si ixos ovulos y ixos espermatozoides fertilizan in vitro y se colocan dentro d’una mai de loguer, yo tendría un fillo producto d’a mía sola actividat reproductiva”.

Implicacions eticas

Tanto ista interpretación como a resta de resultaus que s’extrahien d’ista investigación conllevan problemas eticos. Mesmo os scientificos que han desenrollau iste abance han deixau claro que ixos conflictos han estau presents entre a investigación. “No soi a favor de creyar borches probeta por as implicacions socials y eticas (…) cal reflexionar sobre iste tema. Pero soi seguro que [o prochecto] va a salir ta debant y va a estar muit important t’as personas que han perdiu a suya fertilidat por una malotía”, ha explicau a o periodico anglosaxón Jacob Hanna, coordinador de l’equipo israelí que participa en a investigación.

Si en o Estau espanyol se pretendese de realizar ista investigación caldría pedir permiso a la Comisión de guarancias t’a donación y utilización de celulas y teixius humanos, seguntes preveye a Lei d’Investigación Biomedica. Un d’os promotors d’ista lechislación, Agustín Zapata, considera que a respuesta “sería positiva”.

Asinas un equipo de scientificos podría creyar ovulos y espermatozoides a partir de celulas d’a piel. Diferent, seguntes contina indicando o Catedratico de Biolochía Celular d’a Complutense, sería a respuesta ta chenerar embrions a partir d’ixos ovulos y espermatozoides manipolaus. En ixe caso l’aprebación correría a cargo d’o Comité de Reproducción Humana Asistida. “Se reunen ta decidir sobre o que s’ha denominau borches medecinas, fer servir celulas d’o cordón umbilical d’un chirmán ta tractar a unatro chirmán que tien un defecto que ye irreversible”, explica o profesor que considera que sería dificil d’aconseguir o emparo d’iste organismo ta implantar ista mena de reproducción asistida en o Estau espanyol.

Fuent: http://www.eldiario.es/sociedad/parejas-homosexuales-hijos-biologicos-propios_0_364664170.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.