Una marea multicolor prene as carreras en esfensa d’os servicios publicos

Unas 5.000 personas se manifiestan en Zaragoza contra os retalles, o rescate y en esfensa d'os servicios publicos

Lectura d’o comunicau

A calor d’o diya d’ahiere no fació reblar a unas 5.000 personas que prenoron as carreras zaragozanas en a manifestación convocada por unos 30 colectivos, entre asociacions de vecins, sindicatos, as distintas “mareas” entre atros en esfensa d’os servicios publicos como educación, sanidat u treballo y contra o rescate financiero y os retalles.

A manifestación prencipió en Glorieta Sasera, pasadas as siet d’a tardi, hora a la que yera convocada. Ya dende esferents vicos d’a ciudat, a las 18-18:30 h., diversas “mareas” saliban ta acudir t’a manifestación. Chent de todas as edatz ha recorriu as carreras zaragozanas con multiples pancartas u chilando consignas como “Lo dicen democracia y no’n ye”, “No ye una crisi, ye una estafa”, “A vuestra crisi no la pagamos”, “A educación no se vende, s’esfiende” , “A tu que yes uellando, tamién te son furtando” y atras consignas contra o gubierno y os retalles.

Entre as diversas mareas en ista manifestación multicolor, se i trobaban a marea verda educativa, a marea roya de personas esqueferadas, a marea narancha d’acción social, a marea blanca de sanidat u a marea negra en solidaridat con a luita d’os miners. Tamién i yeran sindicatos como CGT, CNT, SOA, IA, treballadors de TUZSA, FCC u HP, o ret d’emparo a las personas sin papels, asambleas universitarias y asinas-asinas han acompanyau a marcha.

A marcha ha recorriu o centro d’a capital aragonesa pasando por Paseu Pamplona, Av. Cesaraugusto a on s’ha habiu d’esvarrar por Pza. Salamero debiu a las obras d’o tramvía ta pillar finalment a carrera Alfonso y a Pza. d’o Pilar a on ha rematau. Bellas dotacions d’a Policía Nacional espanyola han cusirau o transcurso d’a marcha de cerca estando desplegaus a lo largo d’a manifestación sin incidents.

As esferents pancartas y colectivos d’ista marea multicolor s’han iu posicionand0 a lo largo d’a plaza d’o Pilar y astí una persona immigrant, colectivo d’os mas afectaus por os retalles, ha leyiu o comunicau final poco antis d’as nueu d’a tardi-nueit, denunciando a situación critica d’os servicios esencials publicos de sanidat, educación, treballo por a crisi y os retalles y a suya negativa repercusión en as condicions de vida d’a población, demandando a derogación d’os zaguers decretos-lei.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.