Una plantada d’arbols ferá prencipiar a campanya “Vive o parque Bruil” en Zaragoza

Os organizadors reivindican millors cudiaus y mayor participación en a chestión d'o Parque Bruil

Plantación d'un arbol en 2013

Plantación d’un arbol en 2013

O venient domingo 9 de marzo, o parque Bruil de Zaragoza vivirá una chornada que convida a la participación y a la esfensa d’iste parque. Será o prencipio d’una campanya clamada “Vive o parque Bruil”, que aspera replegar as opinions de vecins d’a redolada d’o parque y usuarios suyos ta saber cómo quieren que se chestione iste espacio verde.

Os actos d’o domingo prencipiarán a las 11:30 con animación infantil y mosica. Dimpués d’una breu presentación d’a campanya, se ferá una plantación popular d’arbols ta rematar o maitin con un socalce vecinal y atras actividatz de participación, endrezadas ta totz os publicos. No ye a primer vegada que se fa una actividat d’ista mena. Ya en anyos anteriors, en calendatas parellanas, se i plantoron arbols por iniciativa propia y con recursos d’a organización. En iste anyo, con l’aduya d’o concello, ye previto de plantar-ie ueito eixemplars: tres plataners, tres ciruelleras, un acirons y un fraixin. Os vecins en han presto atros tres ta plantar-ie, un caixigo y dos moreras.

Antimás se i meterá una mesa a on que os asistents podrán emplir unas enqüestas con opinions y propuestas sobre o parque. Tamién se ha feito un qüestionario on-line”, a on que, dica o 7 d’abril, se podrán fer plegar propuestas t’os empentadors d’ista campanya. Con toda la información replegada, y dimpués d’una asambleya que se ferá en o propio parque, se ninviará un informe ta l’Aria de Medio Ambient d’o Concello zaragozano.

Os organizadors d’a campanya han sinyalau que “l’elemento más sinyaler d’o Parque Bruil ye a suya masa d’arbols que, por a suya variedat, y por tener-ne muitos catalogaus como singulars, fa que siga tot un patrimonio natural, cultural y historico”. Tamién han remerau como a remodelación d’o parque en 2010, a on que “no bi habió participación vecinal”, ha feito que “haiga creixiu a mortandat” entre os arbols d’o parque”, sin que se’n plante de nuevos.

Entre os organizadors d’ista campanya, i son as Asociacions de vecins “Calle y Libertad” y Parque Bruil-Sant Agustín”, as AMPAS d’os CP Tenerías, Gascón y Marín y Cándido Domingo, l’instituto IES Pedro de Luna, y as asociacions Gusantina y ANSAR. En Facebook, se puet seguir y refirmar a campanya en a pachina “Vivimoselparquebruil“.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.