Una riada verda historica fa cara a Bauzá

Os organizadors parlan de novanta mil manifestants en Palma

Manifestación ahiere en Palma. Foto: @STEPV-Iv

Manifestación ahiere en Palma. Foto: @STEPV-Iv

As prencipals ciudatz d’as Islas Balears y Pitiusas escayeixioron ahiere una clamor contra a politica educativa d’o gubierno de José Ramón Bauzá. Decenas de mils de ciudadanos se metioron a camiseta verda d’a revuelta d’os mayestros y salioron t’a carrera ta devantar a voz contra as zagueras imposicions d’o PP y l’aplicación d’o decreto de luengas, que quiere fundir o consenso sobre a immersión lingüistica. Os organizadors calculan que i habió novanta mil asistents en a manifestación de Palma (mas de cient mil en todas as islas). A Sociedat Balear de Matematicas, que s’heba proposau de fer un calculo preciso, diz que se arribó a uitanta mil manifestants en Palma.

A manifestación de Palma empecipió a caminar a las 17.55, cinco minutos antes d’o momento previsto, por miedo a la masificación. A plaza d’Espanya yera atestada y toda de color verda. Sindicatos, docents, pais y mais d’alumnas estioron en masa en a manifestación que os organizadors consideran a mas gran d’a historia d’as Islas. Poco rato dimpués d’haber empecipiau en Palma, tamién rancó a manifestación de Maó, que igualment espardió a color verda d’os concentraus por as carreras d’o centro d’a capital de Menorca. Aproximadament a la mesma hora, mils de manifestants empecipiaban a caminar en Ibiza.

En Palma, a manifestación recorrió d’a plaza d’Espanya dica plaza d’a Reina, en un trachecto d’amán de tres kilometros, mientres mils de manifestants continaban plegando encara en o suyo punto de salida.

Vaga indefinida d’os mayestros

Fa dotze días que os mayestros d’as Islas Balears empecipioron una vaga indefinida que quanto mas va mas fuerte ye. Docents, sindicatos y pais son decidius a mantener a protesta contra o decreto de luengas d’o gubierno Bauzá entre que no s’avenga a negociar l’aplicación. En istas dos semanas a vaga de docents ha escayeixiu en una movilización social con que s’ha embrecau buena parte d’a sociedat balear y que ha desligau a solidaridat y o refirme en a resta de l’Estau.

As conversacions entre gubierno y sindicatos han acabau sin alcuerdo y l’Asamblea de Docents ha decidiu de mantener a vaga indefinida, con o refirme de mais y pais que mesmo s’han sumau activament a la protesta ta que o chornal d’os mayestros no se reduzca tanto.

Han estau dos semanas d’aulas vuedas y carreras plenas, en que a camiseta verda d’esfensa d’a educación publica, de calidat y en catalán ha escayeixiu una oleada de solidaridat. As protestas s’han feito sentir en o parlamento, en a universidat y en plenos municipals de totz os lugars d’as Islas. Y en Barcelona, Valencia y tantas atras ciudatz y villas d’o país que s’han uniu con concentracions de refirme. Y tamién a traviés d’a caixa de resistencia, que ya ha replegau 220.500 euros.

L’Asamblea de Docents niega abances en as negociacions con o gubierno

O portavoz de l’Asamblea de Docents d’as Islas Balears, Guillem Barceló, ha desmentiu que s’haigan zarrau alcuerdos en as negociacions con o gubierno balear por o decreto d’o trilingüismo, como ya heba considerau feito l’executivo de José Ramón Bauzá. Barceló ha explicau que os puntos que se concretaron en a zaguera reunión con o gubierno heban de pasar por l’asamblea antes de zarrar-los. Y o sabado, quasi por unanimidat, estioron refusaus por os mayestros que los consideran ‘insuficients’. ‘Tot queda muit inconcreto, como as plantillas y as ratios, y amenistamos mas concreción y confitanza’, dició o portavoz d’os mayestros.

Asinas pues, caldrá tornar a negociar y presentar a l’executivo balear os puntos que han estau refusaus por l’Asamblea de Docents, en a reunión que s’ha de fer ista tarde.

Fuent: http://www.vilaweb.cat/noticia/4146796/20130930/riuada-verda-historica-planta-cara-bauza.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.