Una uellada externa

Marc Martí

Dimpués d’un tiempo pisando Zaragoza, muitas d’as ideyas preconcebidas dende o que beluns clamarían “as provincias” s’empecipian a cayer, y atras en cambeo continan firmes, como si l’amanamiento a la realidat, a os suyos protagonistas, a o suyo paisache, no variasen o mas minimo dimpués de meter-los dezaga d’o microscopio.

Deixando a un costau muitos comentarios, comportamientos y feitos que dispiertan a mía curiosidat en gran manera, i hai un sobre os de demás que no me deixa de sorprender. Vistos a lo luen, y dende ambients que podemos definir como “afíns”, os movimientos socials y politicos de caracter progresista d’ista ciudat podrían pareixer-se a os existents en atras grans urbes. Si bien, como he dito, quan pisas a realidat, trobas un paisache que, encara que agora ya me sía alto u baixo conoixiu, no me deixa de sorprender. División. No, no seria ista la ideya, millor dicir “atomización”; colectivos, entidatz, asociacións, totz reducius a la suya minima expresión numerica que no activista u valurosa (en garra caso as mías afirmacions meten en dubda o buen, arduo y duro treballo que se leva a cabo dende muitos d’istes “entes” politicos y/u socials).

Me sorprende, no puedo privar-lo; que un rocle de personas afíns a o progresismo de “cuchas” y/u “nacionalista” tant reduciu como o qual pareixe existir aquí de puesto a un mar, por no dicir oceano, d’entidatz, o qual, ye un feito quan menos curioso. Colectivos de 4 personas, asociacions de 15, movimientos de 100, “atomización”.

I hai diferenciacións u divisións que pueden entender-se, mas si dentra en chugo a concepción nacional, pero i hai muitas atras que dificilment responden a atros criterios, en a mía humilde opinión, que a aquells que son vinculaus a las relacións personals y a os chuegos de poder entre os individuos implicaus.

“Sectarismo”, unatra parola dificil. Talment no sía ixe o concepto, pero si podemos charrar d’a creyación d’identidatz compartidas sobre a base d’o refuse a l’atro, a o que no comparte a totalidat d’as nuestras premisas, a o que disiente d’os argumentos chenerals d’o grupo encara que puede compartir gran parte d’os obchectivos d’o mesmo. Por que totz sabemos que no ye lo mesmo estar un socialista independentista que un independentista socialista, u un feminista socialista que un socialista feminista, u no?”

“Individualismo”, yo con as mías ideyas y os de demás con as suyas; encara que uns chicotz matices nos deseparen, lo millor ye que cadagún sigamos o nuestro propio camín.

No voi a dentrar en atras percepcións que tamién se podrían valurar analisando iste ambito como seria a sobrevaloración d’as propias entidatz u as suyas filias u fobias mas evidents, simplament me truca o ficacio iste mar d’entidatz minusclas que nada cadaguna por o suyo costau sin parar cuenta en que totz quieren plegar a un punto d’a mesma marguin.

7 Rispuestas a Una uellada externa

  1. No, viva el Frente Judaico Popular!

  2. Isto ye Aragón.

  3. Ixa ye a nuestra tristera reialidat, una otra coseta que se s’oblida de comentar o autor/a ye a brecha cheneracional. Chens de mas de cuarenta añadas no existen en os colectivos, en otros pueblos chermans como Nabarra existen colectius de chubilaus que luitan i tremolan tanto u mas que os chobens, cosa que huei i asti suena a chimera.

  4. … pero y a lo a gustito q están …

  5. Ye verdat que truca o ficacio quan por primer vegada te trobas ista realidat, pero no lo veigo tan grau, mesmo veigo menester ista pluralidat y autonomia, siempre que existan puntos de trobada do arroclar-nos totz y todas ta causas comuns.

    Mas me’n foi por o que diz enver555 tocant a la edat que no por isto.

Responder a enver555 Cancelar respuesta

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.