Unatra muller asesinada por a suya parella en Zaragoza

L'homicidio pareixe que estió cometiu en o cabo d'o mes pasau. O sospeitoso yera en Cantabria y prebó de suicidar-se o martes. O cuerpo d'a muller ha estau trobau despiazau en casa suya

800px-Las_Fuentes_(Zaragoza)

Entrada t’o vico d’As Fuents. Foto: Biquipedia

V. S. G. ha estau informau por a Guardia Civil de que queda oficialment deteniu como presunto autor de l’homicidio de M. P. R. No se le heba puesto comunicar antis debiu a o suyo estau de salut, pues ye en l’hespital de Torrelavega (Cantabria) debiu a que prebó de suicidar-se con sobredosi de farmacos. O crimen estió cometiu a finals de mayo en Zaragoza, en a carrera Leopoldo Romeo d’o vico d’As Fuents. L’hombre se’n fue ta Cantabria a on poco dimpués, o pasau martes, prebó de suicidar-se.

O presunto homicida deixó una carta a la familia de l’asesinada a on facilitaba datos ta poder trobar o cuerpo d’a muller y explicaba porqué heba cometiu o crimen. Miembros d’a Policía Chudicial d’a Guardia Civil entroron en o domicilio d’a parella a on troboron o cuerpo despiazau en bolsas d’a muller en un arcón conchelador.

O cuerpo ha estau trasladau a l’Instituo de Medicina Legal d’Aragón a on os forenses practicarán l’autopsia y compararán l’ADN suyo con o d’os familiars, asinas como con l’ADN d’una garra trobada fa diyas en l’entibo de Pina d’Ebro.

Os vecins y vecinas troboron a faltar a M. P. R. y declaroron que V. S. G. les heba dito que a suya parella yera en un centro sanitario psiquiatrico. O vecindario comenta que se podeban ascuitar bellas peleyas en o piso y que mesmo fa bellas semanas a muller levaba una moradura en un uello.

O sospeitoso pasará a disposición chudicial en Zaragoza malas que siga dau d’alta. Mientres, o Concello de Zaragoza ha feito hue una concentración de repulsa, y o Gubierno d’Aragón asinas como a ministra de Sanidat, Servicios Socials y Igualdat, Ana Mato, tamién han expresau a suya repulsa.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.