Unatra vez, mas de 24000 aragoneses deberan rogar o suyo dreito a voto.

Os aragoneses residents en l'exterior no replegaran en casa suya ni la tarxeta censal, ni a documentacion amenistada ta votar por correu

Foto: Jubilo Haku

Foto: Jubilo Haku


S’amana o 20-N y mas de 1.200.000 aragoneses ( d’os quals poco mas que 1 millon viven en Aragon) son clamaus t’as urnas en iste nuevo clamamient electoral t’as cortz y o senau espanyols. Bells 24.000 figuran como residents difuera de l’Estau espanyol, y como novedat respecto a las eleccions chenerals de 2007, istos deberan rogar por escrito o suyo dreito a voto.

Antiparti, os mas de 200.000 aragoneses residents en l’exterior pero aintro d’as mugas de l’estau espanyol podrán votar de traza normal en a circunscripcion electoral provincial an que sigan rechistraus.

Ye que debiu a la reforma d’a lei electoral que en 2010 apreboron PSOE+PP con a connivencia de CiU,BNG y PNV, istos habrán de rogar de traza escrita a la chunta electoral provincial en a que sigan inscritos como residents exteriors o suyo dreito a voto.

En muit pocas ocasions istos partius s’han meso d’alcordo en qualcosa mientras a zaguera lechislatura, pero truca lo ficacio ista reforma d’o dreito a voto exterior que ha pasau de bislay, retallando os dreitos politicos de mils de ciudadans tant y mientres a clamor d’a ciudadania ye demandando mayor participacion y una recheneracion democratica.

De feito, no ye iste o primer clamamient electoral an que s’aplica ista reforma, ya que se  inauguró en as eleccions t’os concellos y autonomicas d’iste mesmo anyo, quan se sacó,  d’un costau  o dreito a voto t’os residents en l’extranchero  en as eleccions locals y antiparti t’as cortz d’Aragon se metioron uns requisitos qu’acotoloron a participacion a percentaches marchinals.

Cal dicir, que en l’entorno d’a Union Europea ye explicable acotolar o dreito a voto t’os concellos t’os aragoneses de l’exterior, ya que istos tienen dreito t’o sufraxio activo y pasivo si residen en bell Estau d’a Europa d’os 27, pero que tien una dificil explicación en o caso d’os aragoneses residents en qualsiquier estau que se trobe difuera d’a Unión Europea, an que  no gozan d’ista reciprocidat de dreitos.

Seguntes diferents residents en l’extranchero consultaus, que se miroron d’exercer o suyo voto en as zagueras eleccions autonomicas, garra d’ellos recibió a documentación amenistada, a penar d’haber ninviau a solicitut en forma y plazo a la chunta electoral provincial.

No disposamos de datos especificos t’Aragon, pero ta tot l’Estau espanyol, a participación d’os ciutadans de l’exterior baixó d’un 24,6% t’un insignificant 3.6% en as zagueras eleccions.

Cal preguntar-se agora por o silencio sobre iste tema por parti d’os partius politicos a tasament dos meses d’as eleccions, respecto a la retallada de dreitos alacetals de mas de 24.000 aragoneses que habioron de dixar as mugas de l’estau espanyol por diversas razons y que huei ripresentan o 2,4% d’o censo aragones.

6 Rispuestas a Unatra vez, mas de 24000 aragoneses deberan rogar o suyo dreito a voto.

  1. Huei, a unica ventaxa que tien estar rechistrau en o consulau ye que no te claman ta la mesa electoral o que si te claman (caso por exemplo d’os rechistraus como “no residentes) se puede chustificar con facilidat, ah! y poder renovar o pasaporte, pero ta lo demás…

  2. L’anyo pasau estié viviendo por razons de treballo en Estaus Unius. Me metié en contauto con o consulau espanyol en Chicago y me dición que si no me i heba rechistrau (denguno m’heba dito que calese fer-lo), nomás me quedaba a posibilidat de votar como desplazau temporal (u bella cosa asinas, no me’n acuerdo bien). Les pregunté por os tramites que caleba fer, y me respondión que ise mirando-me a web d’ellos, que ya en irían informando, u que me pasase por o Consulau (viviba en una ciudat a bellas cinco horas en auto de Chicago). A la fin decidié no votar, a primera vegada en a mía vida. Culpa mía, sí, pero ixa chent de o consulau no me lo metión mica fácil y amostrón muit poco intrés en que quereba votar y no iba a poder fer-lo.

  3. By the way… “viviendo” ye una platera erranza, yo churaría haber-ie meso “vivindo”…

  4. Quan viviba en o Pacifico me dicioron de nimviar o mio pasaporte ORICHINAL a 20.000 km si quereba votar. Agora que soi en Europa de l’Este (difuera d’a UE) soi uno d’ixos que han teniu que “rogar” o voto y asperar a que lo nimvien. Veyeremos si a la fin s’alcordaran…

  5. Mesmo estando rechistrau como resident en l’exterior en o consulau, ya no se ninvian as documentacions ta votar por correo, cal escribir por correu certificau a la chunta electoral provincial(lo bosas tu, profes! o voto ta os que vivimos difuera de l’estau no ye gratuito),rogando votar achuntando o tuyo dni u pasaporte y o documento en forma qu’ellos demandan, dispues cal rezar ta que no avienten a tuya solicitut ta la basuera y te rispondan a tiempo. En o mio caso, malas que ninvie totz os documents en tiempo y forma en as zagueras eleccions, encara soi asperando a suya carta…
    Ta yo, ye esclatero que y con a enchaquia d’estalviar-se diners (que no lo en fan a la fin), ye una retallada muit grau de dreitos alacetals d’una parti d’a poblacion que por desgracia cada anyo crexe y crexe (o 2011 o numero de aragoneses vivindo fuera de l’estau espanyol puyo un 8% tant y mientras a poblacion que vive en Aragon solo lo facio un 0.1%… ixo fabla por si solo)

    Esprisions !

    • Yo ba votar dende l’extranchero en mayo d’estianyo y fa bellas semanetas me ban tornar as perras por a correspondencia postal (4 euros).

      Antiparte, me pareix prou bien que no s’invien por correu a os votans en l’exterior os paquetz con todas as papeletas, yera malmeter paper sin mica chuque.

      Antimas, este mayo o Consul nos mando un correu a totz os espanyols residens en o pais an que vivo informando-nos sobre a forma de votar.

      Sincerament, creigo que no cal desacherar, estoi que tot pende d’a buena voluntat d’o Consul de turno.

      Exprisions.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.