Vada cheneral en Italia contra o plan d’austeridat d’o gubierno de Monti

Ye de tres horas y la han convocada os tres sendicatos mayoritarios italianos.

Os sendicatos mayoritarios italianos, a Unión de Treballadors (UIL), a Confederación Cheneral Italiana d’o Treballo (CGIL) y a Confederación Nacional de Sendicatos de Treballadors (CISL), han convocau hue una vada de tres horas (as zaguers de cada daria de treballo) ta protestar contra o plan d’austeridat aprebau por o gubierno de Mario Monti fa agora una semana.

A vada no tien o refirme d’os sendicatos d’o sector publico, de transportes y de servicios basicos, que han decidiu de convocar-ne una atra en una calendata encara por definir.

Os sendicatos dicen que son preocupaus por as conseqüencias que puet tener o nuevo plan d’achuste sobre os treballadors, os chubilaus y as expectativas de desembolique d’o país. Os liders d’os tres sendicatos, Luigi Angeletti, Susanna Camusso y Raffaelle Bonanni, demandoron o viernes pasau una reunión con o gubierno y totz os partius d’o parlamento “ta solicitar a presentación d’esmiendas a o plan d’achuste mientres o proceso parlamentario”.

Un plan con mil trescientas esmiendas parlamentarias

A comisión de presupuestos d’a cambra de diputaus italiana heba recibiu o viernes más de mil trescientas esmiendas a o texto d’o plan d’austeridat aprebau por o gubierno. A mayoría, las heba presentadas a Liga Norte, bellas seiscientas esmiendas sobre a reforma d’as pensions, os impuestos inmobiliarios, a puyada de l’impuesto d’a bencina y as retalladas a os entes municipals.

O partiu Italia d’as Valors en heba presentau ciento trenta y quatre, y o Partiu Democratica, ciento sixanta. O partiu de Silvio Berlusconi, o Pueblo d’a Libertat, ha demandau que l’impuesto de propiedat s’esparda tamién a las parroquias y a os centros de culto.

 

Fuent: http://www.vilaweb.cat/noticia/3959474/20111212/vaga-general-italia-pla-dausteritat-govern-monti.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.