Vadas y protestas en toda Europa contra as midas d’austeridat

O 14N ye estada a mayor movilización d'os treballadors d'Europa dende o prencipio d'a crisi

Manifestación d'estudiants y treballadors en Pisa, Estau italiano (Foto: demotix.com)

Manifestación d’estudiants y treballadors en Pisa, Estau italiano (Foto: demotix.com)

Millons de treballadors de toda Europa han protagonizau as vadas y protestas convocadas en muitos países. Nomás en l’Estau espanyol y Portugal a vada teneba caracter cheneral. En atros estaus, se convocaban accions como atures parcials, manifestacions u chornadas de luita.

En l’Estau espanyol, a vada consiguió aturar a mas gran parti d’o sector industrial y productivo encara que tenió menos impacto y se fació menos vistera en sectors como lo comercio. D’atra man, as manifestacions y concentracions arrocloron a arrienda personas en actos multitudinarios en as principals poblacions. En tot l’estau bi habió incidents más u menos graus con os cuerpos de seguridat, rematando a chornada con más de 100 detenius y decenas de ferius.

Portugal viyó ahiere un gran exito en a vada, más que más en transporte y servicios publicos d’as grans ciudatz. As protestas tamién rematoron con barallas entre manifestants y policía con un total de 7 detenius y 48 ferius. Ye a tercer vada que se convoca en iste país en os 16 meses que leva en o poder o primer ministro, o conservador Pedro Passos Coelho.

En Grecia, a convocatoria yera de una vada de tres horas que se viyeba como continación d’a que se fació a semana pasada de 48 horas. As organizacions convocants daban un seguimiento de más d’un 50%. En a capital, Atenas, una marcha arroclaba a mils de personas portando sinyals de Grecia, Espanya, Portugal, Italia y Irlanda, os estaus más afectaus por as politicas de retalladas.

A chornada de vada en Italia, a on que se feba un ature de nomas quatre horas, ha rematau con graus concaramientos entre manifestants y policía en belunas d’as principals ciudatz como Roma, Milán u Turín. A famosa torre de Pisa ye estada ocupada mientres una hora por manifestants que i penchoron una pancarta a on que meteba “Rise up. Non pagheremo la vostra crisi” (devantatz-tos! no pagaremos a vuestra crisi).

En Belchica os servicios de transporte internacional tamién s’han interrumpiu en ista chornada. Diferents protestas s’han viviu en a resta d’estaus europeus como as que bi ha habiu en Irlanda, Chipre, Francia, Reino Uniu, Alemania u Polonia. Todas ellas con obchetivos y reivindicacions comuns como a luita contra as retalladas d’os dreitos d’os treballadors y as clamadas politicas economicas d’austeridat. Ista convocatoria de manifestacions europeas ya ye estada a mayor movilización de man d’os treballadors contra istas midas dende que prencipió a crisi de deuda d’a zona euro.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.