Vaga indefinida en os centros de treballo de Hewlett Packard

Quasi tres anyadas de conflicto entre HP y a suya plantilla plegan en una vaga indefinida que por agora ye resultando masiva

salahpzaragoza

Sala d’ordinadors vueda ahiere de nueitz en Zaragoza. Foto: CGT

548 personas en Zaragoza, chunto a la resta de personal d’a resta de l’Estau (mas de 2.000 treballadors y treballadoras) han prencipiau una vaga indefinida en Hewlett Packard (HP) en protesta por a situación a la que consideran les ha levau a interpresa. Son dos as interpresas de HP afectadas, Hp Consultoría y Aplicaciones y Hp Outsorcing. HP planteya una modificación sustancial en as condicions de treballo, con un aumento d’a chornada de treballo y una diminución d’os suyos chornals.

A interpresa planteya rebaixas en os chornals de mesmo un 10%, con incremento d’a chornada anyal y a implantación d’a chornada irregular. A plantilla tien o chornal chelau dende 2009 y o conflicto ya leva quasi tres anyadas sin resolver-se. Ista será a primer vaga indefinida d’a historia d’a multinacional informatica.

Tanimientres, representants d’a plantilla y d’a interpresa negociarán en Madrit dimpués de que o chueves os representants d’os treballadors y treballadoras fesen una ufierta a la interpresa. O comité denuncia que continará a politica de fer fuera a qui quieran de forma improcedent. Denuncian que 52 personas ya han estau forachitadas d’o suyo puesto de treballo en tot l’Estau mientres istos anyos, 12 d’ellas en Zaragoza. Tamién aseguran que HP podría fer un ERE si no conseguisen prou esquimen con as midas planteyadas a la plantilla y recordan que HP ye “una interpresa multinacional y con ganancias trimestrals reportadas mientres l’exercicio anterior y mientres o primer trimestre d’iste anyo”.

Ahiere de nueitz empecipió ista vaga y por agora o seguimiento ye resultando masivo seguntes informan os sindicatos convocants (UGT, CGT, CSI y CC.OO), con un 80% de seguimiento en Zaragoza, un 100% en Lión y Oviedo y quasi un 90% en Barcelona.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.