Vecins de Mont Albán molestos con o concello por a supresión d’as corridas pedestres

As tradicionals corridas pedestres estioron suprimidas en as zagueras fiestas patronals, feito que ha causau prou malestar en o lugar

Corridas pedestres en Mont Albán

Corridas pedestres en Mont Albán

En as pasadas Fiestas Patronals de setiembre de Mont Albán, se suprimioron as corridas pedestres, una actividat quasi centenaria que convocaba a o vecindario, anyo sin atro, y que teneba una respuesta muit important de publico asistent a l’acto. Ista supresión ha causau malestar entre muitos vecins y vecinas amants de l’atletismo, que asistiban a las corridas o zaguer día d’as Fiestas, y que suposaban un important colofón a las celebracions.

Dende os anyos 20 d’o sieglo pasau han iu pasando por Mont Albán atletas de gran nivel, tanto d’Aragón como internacionals, en un escayecimiento esportivo que atorgaba a Mont Albán un gran empaque y que suposaba l’acto esportivo anyal de mayor nivel en a localidat d’a comarca d’as Cuencas Mineras.

Seguntes Izquierda Unida “l’alcalde de Mont Albán, manimenos, s’espachó de traza muit simpla, sin asumir garra responsabilidat; ye mas, treslada toda a responsabilidat a la Comisión de Fiestas, dicindo: ‘a decisión ha estau d’a Comisión, que ye a que s’encarga d’organizar os festeixos”.

“Pero, l’alcalde de Mont Albán no diz toda a verdat: dende fa mas de 20 anyos, a responsabilidat de planificar, parar, organizar, desembolicar y chestionar a Chornada de corridas pedestres d’as Fiestas Patronals ha estau de l’alcalde y d’o concellero d’esportes. Simplament” asevera IU.

“A Comisión de Fiestas -adhibe IU- ha colaborau prencipalment en a financiación d’as corridas pedestres, pero tot o de demás ha estau responsabilidat d’o Concello. De traza que, independientment d’a programación de festeixos que realice a Comisión de cada anyo, l’alcalde y o concellero d’esportes han d’asegurar a realización d’un acto tradicional, como son as corridas pedestres, y como heba ocurriu dica agora, a responsabilidat ye exclusivament municipal”.

Por ixo, o grupo municipal d’IU en Mont Albán insta a l’alcalde a que “cumpla as suyas responsabilidatz y mantienga as corridas pedestres d’as Fiestas patronals, t’os anyos veniders. Sin ‘echar balones fuera’, sin responsabilizar a la Comisión de Fiestas”.

En zaguerías IU denuncia que “ya s’han perdiu actividatz que se desembolicaban con anterioridat, y que han feito descender o nivel cultural y esportivo de Mont Albán, responsabilidat exclusiva d’o Concello”.

Fuent: http://arainfo.org/2013/10/vecinos-de-montalban-molestos-con-el-ayuntamiento-por-la-supresion-de-las-carreras-pedestres/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.