Vecins d’o Viello Aragón se manifiestan por a paralización d’o prochecto urbanistico que estrafallará o casco historico de Tiermas

Se realizó ahiere una protesta en Tiermas reclamando que se tornen Tiermas y Esco a os suyos antigos habitadors, asinas como exichindo l'ature d'o recreiximiento de Yesa

Foto: Puyalón de Cuchas

Foto: Puyalón de Cuchas

Un centenar d’antigos habitants de Tiermas y Esco chunto a las y os vecins d’Artieda se concentroron ahiere en a N-240 a l’altaria de Tiermas ta denunciar o macroprochecto urbanistico elaborau por o concello de Sigüés. Un macroprochecto que seguntes expresan os y as manifestants en un comunicau ocupará y estrafallará o casco historico de Tiermas, lugar que dimpués d’a construcción d’o entibo de Yesa estió expropiau y deshabitau. Entre a protesta se veyoron pancartas en que se podeba leyer “Esco ye vivo”, “Ruesta no ixublida”, “Rios vivos Yesa NO” y “Tiermas ye nuestro, devolución”.

As personas concentradas han reiterau a necesidat que os lugars de Tiermas, Esco y Ruesta sían tornaus a os suyos antigos vecins y no sían obchecto de prochectos urbanisticos que “responden a os intreses d’uns pocos”. Amás, han aprofitau a concentración de trafico (con motivo d’a operación retorno d’o puent d’a Constitución) ta exichir -en a carretera y chunto a o lugar de Tiermas- a paralización immediata d’o recreiximiento d’o entibo de Yesa por “os mas que evidents problemas de seguridat, socials, economicos y medioambientals d’ista obra”.

A organización politica Puyalón de Cuchas, present en a protesta, ha exichiu tamién a la Confederanción Hidrografica de l’Ebro (CHE) a paralización total d’o prochecto de recreiximiento d’o entibo de Yesa y o suyo vaciau decamín, de traza que se pueda guarenciar a seguridat d’as y os vecins d’as localidatz cercanas t’o entibo. “Ye intolerable que en ista situación de crisi economica como l’actual se contine aumentando o presupuesto d’ista obra faraonica, estando que existen alternativas mas sostenibles, economicas, social y medioambientalment”, denuncian.

O concellero de Puyalón de Cuchas en Artieda, Israel Orera, declaró: “Nos oposamos a o recreiximiento de Yesa y apostamos por un modelo de desarrollo sostenible, que respecte as economías locals y os modelos historicos de vida d’as nuestras vals”.

Fuent: http://arainfo.org/2013/12/vecinos-del-viello-aragon-se-manifiestan-por-la-paralizacion-del-proyecto-urbanistico-que-destruira-el-casco-historico-de-tiermas/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.