Venezuela fa l’adiós a o suyo president, Hugo Chávez

Chávez moriba anueit ubrindo un nuevo tiempo en Venezuela

O president Chávez

O president Chávez

O cancer ha venciu a la fin a o president de Venezuela Hugo Chávez. O vicepresident Nicolás Maduro, dimpués d’anunciar de meyodías midas especials, compareixeba de nueitz ta fer l’anuncio oficial d’a muerte de Chávez. Maduro feba un clamamiento ta “canalizar o dolor en paz y tranquilidat”.

O pueblo de Venezuela ha saliu en a carrera t’amostrar a suya pena por a muerte d’o comandante Chávez, mientres que l’exercito preneba posicions ta controlar cualsiquier prebatina golpista.  O vicepresident Maduro tamién ha anunciau bellas midas ta comprebar si Chávez ha estau victima d’una conspiración, como sospeita lo gubierno, que ditz tener “pistas” d’una conspiración.

Hugo Chávez plegó en o poder en 1998, encara que en 1990 ya heba feito una preba de golpe militar, dimpués d’o qual estió dos anyos engarcholau. Pero en 1998, en meyo d’una gran popularidat, Chávez plegaba t’a presidencia en unas eleccions, as primeras de totas as que han asegurau as suyas reeleccions ta levar a cabo o suyo prochecto más ambicioso, a revolución bolivariana que ha cambeau d’alto ta baixo o país.

A revolución ha contau con o refirme d’as clases populars venezolanas, que han visto en o caudillismo de Chávez a rispuesta a las suyas miserias. Con un carácter de vegadas histrionico y populista, as formas de Chávez no pueden deixar amagadas as suyas victorias en o reparto d’a riqueza derivada d’o petrolio. Os meyos de comunicación privaus, bells de quals han estau dimpués trancaus, y os liders de negocios han amostrau siempre a suya oposición a Chávez, y mesmo en 2002 preboron de fer un golpe d’estau que remató con Chávez engarcholau mientres que a reacción d’os militars leyals y as protestas en as carreras li tornoron a lo poder.

Chávez ha nacionalizau os sectors claus d’a economia fendo posible que as taxas de pobreza d’o país baixasen de traza radical. Tamién ha estendillau l’alfabetización entre as clases populars, encara que no ha puesto aconseguir baixar a taxa de criminalidat. Entre as suyas uembras, tamién, a represión de bells meyos de comunicación. Con tot i con ixo, Chávez ha ganau as eleccions a las que s’ha presentau, entre observadors internacionals que han verificau os procesos.

A meyaus de 2011, anunció que teneba cáncer. Encara que s’ha sometiu a quatro operacions en Cuba o cáncer ha puesto a la fin rematar a vida d’un hombre con un estilo propio y que ha refeito Venezuela. O suyo legau ye iste cambeo, que con o tiempo deixará veyer a suya profundidat.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.