Vettel tricampión d’o mundo

O piloto alemán gana o tercer mundial seguiu. Red Bull tamién se fa con o campionato de constructors.

Vettel en Barcelona. Foto: Julien Rebouliet

Vettel en Barcelona. Foto: Julien Rebouliet

Sebastian Vettel (Red Bull) ha conseguiu o tercer titol de camìón d’o mundial de Formula 1 dimpués de quedar seiseno en a corrida de hue en o circuito de Sao Paulo, en Brasil. Vettel gana asinas un d’os mundials más emocionants d’as zaguers anyadas a on que tretce pilotos d’os vintiquatre que competiban son pasaus por o podium. Dezaga d’ell quedaban Alonso (Ferrari) y Raikonnen (Lotus).A corrida prencipiaba emocionant de tot, con Vettel surtindo dende a quartena plaza y Alonso dende a sietena, en una clasificación que ganó a pole Hamilton (McLaren). Nomás ixos dos pilotos podeban fer-se matematicament con o mundial. En a salida, un trucazo con Senna (Williams) fació trompear a Vettel, dando bellas opcions a Alonso. A plevia yera estada a protagonista mientres tot o cabo de semana y no podeba estar menos en a corrida. Fineta pero perén, feba aturar a la mas gran parti de pilotos, que no quereban arriscar-se a salir-se d’a pista, cosa que pasaba cutio-cutio.

Un safety car, dimpués de que Rosberg (Mercedes) punchase una rueda, reordenaba toda a corrida, deixando a Alonso quarteno chusto debant de Vettel. T’o 53eno chiro, a plevia feba prencipiar un baile de pasos por boxes ta cambiar y descambiar ruedas y provocaba esbarizadas, salidas de pista y trucazos como o de Hulkenberg (Force Indica) con Hamilton que deixaba difuera d’a corrida a o britanico.

Ent’a vuelta 60 l’espurniar se tornaba plevia firme y embolicaba a-saber-lo o conducir. Button (McLaren) continaba primer sin reblar y muito luen de Alonso, o segundo, y de Vettel, seiseno. A corrida remataba con o Safety Car en primer puesto dimpués de l’accident que tenión Paul DiResta en o 70eno chiro. O podium final d’a carrera estió Button primero, seguiu de Alonso y un emocionau Massa (Ferrari), qui feba tercer puesto dimpués d’una extraodinaria corrida en o suyo país.

O mundial 2012 remata con una atra victoria ta Sebastian Vettel y ta Red Bull, qui se fan tamién con o campionato de constructors seguius de Ferrari y McLaren. Con tot y con ixo, o liderazgo d’a escudería austriaca no ye estau tan esclater como en anterior mundials ganando Vettel por nomás 3 puntetz y sufrindo dica la zaguer vuelta. A fiabilidat de l’auto ye estada una d’as qüestions que más fació tremolar a Red Bull en habendo teniu bells problemas mientres o mundial con a mecanica.

Cambeos ta l’anyada venient

Como todas las anyadas, quasi en rematar o mundial prencipia a parar-se o venient. Encara que ni Red Bull ni Ferrari ferán cambeos de pilotos, no ye ixe o caso de McLaren qui veye marchar-ne a Hamilton, y viyerá plegar-ie a Sergio Pérez. L’anglés sustituyirá en Mercedes a Schumacher, qui deixa a Formaula 1, ista vegada ta cutio, seguntes dició. En Sauber tot cambiará, a on que Esteban Gutiérrez y Nico Hulkenberg sustituyirán a Kobayashi y Pérez. Prou que encara falta pilotos por confirmar u achustar y viyer si bi habrá cambios en os regles t’anyada venient.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.