Viedada una charrada sobre exiliaus republicanos en Saliellas de Xalón por a chornada de reflexión

A charrada s'iba a fer iste sabado aintro d'un ciclo d'animación t'a lectura.

Portalada d'o libro de Diego Gaspar

Portalada d'o libro de Diego Gaspar

A Chunta Electoral Central ha viedau una charrada que iba a fer o historiador Diego Gasar Celaya sobre os exiliaus republicanos iste sabado en Saliellas de Xalón. O motivo, seguntes l’organismo ye que, en estar chornada de reflexión, a charrada podría tener connotacions politicas u mesmo charrar sobre a Lei de Memoria Historica.

A charrada yera aintro d’una campanya d’animación t’a lectura que ye fendo a Diputación Provincial de Zaragoza en cualques bibliotecas d’a provincia. Tamién s’enmarcaba en os actos de remeranza d’o 75 cabo d’anyo d’a Guerra Civil. L’autor d’o libro Republicanos aragoneses en la II Guerra Mundial, Diego Gaspar no entiende que s’haiga viedau a charrada y no viye que tienga conteniu que pueda influyir en as eleccions. A DPZ ha dito que a charrada se ferá, encara que en una atra calendata.

Tamién en a chornada de reflexión, o movimiento 15M de Zaragoza, ha avisau a lo Delegau d’o Gubierno que ferán asambleyas en a Plaza d’o Pilar. Bi son convidaus totz qui quieran “charrar librement d’os suyos problemas y inquietutz”. Mientres a chornada se ferán actividatz como charradas y tallers, a on que participarán personas y colectivos como Pedro Arrojo, Ecologistas en Acción u o Centro Social Okupau Kike Mur.  A las 20:00 bi ye convocada tamién una “batiauguada” en protesta “debant d’un sistema gubernau por os mercaus y que ixublida a las personas”. En l’inte de escribir isto, ni a Chunta Electoral ni a Delegación d’o gubierno espanyol no en han dito mica.

Manimenos, en Madrid, o suyo Tribunal de chusticia sí que ha autorizau actos d’apolochía d’o franquismo convocaus por Falange y atras organizacions de dreitas. Istos actos se ferán tanto maitín en a chornada de reflexión, como o mesmo domingo a on que ferán a tradicional misa en a Val d’os Caitos, a on que son apedecaus Francico Franco y Jose Antonio Primo de Rivera.

Una rispuesta a Viedada una charrada sobre exiliaus republicanos en Saliellas de Xalón por a chornada de reflexión

  1. Pero as gambadas t’a Val d’os Caidos se pueden fer, no?

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.