Villanueva de Xalón s’une ta recuperar a Ilesia-Fosal mudechar de Santa María de Huerta

Naixius y naixidas y descendients de Villanueva de Xalón preban de recuperar a ilesia de Santa María de Huerta

VillanuevaJalon-300x225

Foto: Apudepa

D’entre o medio centenar de personas que asistioron a la cita anyal, o pasau 22 de chunio de 2013, que reune a os naixius y naixidas de Villanueva de Xalón y a os suyos descendients, a lo menos media dotzena d’ells, yeran güelos y güelas naixidas d’iste lugar, hue municipio de Chodes en a comarca d’a Val de Xalón.

Villanueva de Xalón ye una localidat no habitada dende 1960. Encara que a enrona progresa en o lugar de forma inexorable, os suyos antigos habitants no s’aconortan con iste estau d’as cosas y asinas lo estioron expresando allí mesmo con emoción contenida os mayors de Villanueva.

Totz y todas ellas tienen mas de 80 anyos y entre ellas contamos con a presencia de Josefina y de Venancio, qui, no sin dificultatz, tenioron fuerzas suficients ta ascender a o suyo escarpau y fermoso lugar. Antes de morir deseyan veyer cumpliu un intimo deseu vital ligau a la suya memoria: a recuperación d’a ilesia-torre mudechar de Santa María de Huerta que los acullió en naixer asinas como o fosal d’os suyos antipasaus.

Apudepa, que i asistió acompanyando a vecins y vecinas en dita asamblea anyal, explica que “a torre d’a ilesia, Bien Catalogau d’o patrimonio aragonés, estió construida por os mudechars pero tien sobrepuesto un simple cuerpo de campanas. Destacan de tot o conchunto o castiello medieval y a ilesia mudechar y todas dos edificacions cuentan, plegando dende a localidat de Morata, con un perfil d’una polideza muit exclusiva, arquitectura encaramada sobre un cortau, perfecto ensamblache entre naturaleza y memoria. Disfruta Villanueva d’os esquimens d’as auguas d’o río Xalón que discurre a os suyos pietz, conformando a suya retuerta un remanso de paz, entorno agricola y agreste de poderosa belleza. Tal ye a singularidat d’iste paisache”.

L’acto acabó con una ofrenda de flors depositada en a ilesia, en os nichos d’o fosal y debant d’a Virchen d’a nuestra Sinyora d’a Huerta, homenache de Naira Gallardo arquitecta creyadora d’o Prochecto rEvive. Una asamblea muit participada y una amena lifara zarroron l’acto. En ell se alcordó de constituir-se en una asociación ta proceder a las solicitutz oportunas y en o caso que o departamento de Patrimonio Cultural d’a DGA y a Diputación de Zaragoza no cumplisen con a obligación legal de recuperar a torre y as yeserías mudechars d’as suyas dos capiellas, l’asociación de Villanueva de Xalón, refirmada por Apudepa, procederá a actuar en iste bien comunal apeando o que siga estrictament necesario a fin de privar a suya enrona total. “Iste espacio d’a Memoria no puede morir porque le’n debemos como homenache a os güelos, a güelas, y a os suyos antipasaus”, concluiban belunas d’as presents.

Fuent: http://arainfo.org/2013/06/villanueva-de-xalon-se-une-para-recuperar-la-iglesia-cementerio-mudejar-de-santa-maria-de-huerta/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.