Violencia policial en Valencia y concentracions en Aragón ta protestar-ne

Más de 20 detenius y decenas de ferius en Valencia en a tercera chornada de violencia policial en as carreras

As protestas d’os alumnos de l’instituto Lluis Vives, de Valencia, rematoron ahiere atra vegada en una chornada de violencia policial que remató con más de 20 detenius y decenas de ferius. A chornada, convocada por os alumnos ta protestar d’a violencia d’o diya d’antis, se tornó en atra chornada negra en que a policia s’extralimitó en as suyas funcions, como ha reconoixiu mesmo o ministro espanyol d’Interior, Jorge Fernández Díaz. O ministro tamién ha dito, manimenos, que bells d’os manifestants yeran violents y que por ixo l’actuación policial habió d’estar contundent.

Bells 200 alumnos y alumnas s’heban concentrau debant de l’instituto y heban tallau a carrera, que a policia nacional espanyola prebó de desaloixar. Mientres tota la tardi a ciudat estió veilada por a policía que encorreba a collas de chovens que prebaban d’amanar-se ta l’Instituto.

Foto: @angelramire

Foto: @angelramire

O discurrir d’a chornada podió siguir-se en os hashtags de Twitter #primaveravalenciana y #IESLluisvives. Amás, o chefe d’a policía espanyola en Valencia, Antonio Moreno, escalfó encara más l’ambient, declarando que os estudiants yeran “l’enemigo”. En a Universidat de Valencia, a decana d’a Facultat de Cheografia y Historia concaró a la policia espanyola que queraba dentrar-ie ta forachitar a bells 500 estudiants que se i heban trancau.

Encara que l’orichen d’as protestas yera a manca de recursos ta la calefacción d’o centro, o president de Valencia, Alberto Fabra, ha chustificau l’actuación policial y ha reclamau rispeto ta lo dreito de manifestación pacifica, que seguntes ell “se ye crebando de contino en istos tres zaguers diyas”. Amás, tamién ha dito que as protestas son por as reformas d’o PP que “votoron a gran mayoría d’os ciudadans”.

Concentracións en Aragón

Diversos colectivos d’estudiants han convocau ta ista tarde una concentración en as puertas d’a Ciudat Universitaria de Zaragoza ta refusar os feitos ocurrius en Valencia y por a educación publica, seguntes sinyalan en un comunicau.

L’acto se ferá a las 20 horas y ha ye convocau por ADEA (Asociación d’Estudiants d’Aragón, d’amostranzas meyas), CEPA (Colectivo d’Estudiants Progresistas d’Aragón), CHEN (Chuntos  Entaban), EDU (estudiants en esfensa d’a universidat), ReFyL (Plataforma Reforma de Filosofía y Letras), SEI (Sindicato d’Estudiants de Cuchas) y UCA (Unibersidá-Colectivo Aragonesista).  Tamién s’ha convocau unatra concentración, a la mesma hora, en a puerta d’a Facultat de Sciencias Socials y Humanas, en Teruel.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.