Visita d’a Princesa Letizia t’o CPIFP Pirámide de Uesca en bell medio de protestas

A Princesa d'Asturias, Letizia Ortiz, alcompanyada de Luisa F. Rudi y Dolores Serrat han visitau o centro. Yera convocada una concentración de protesta por a educación publica y contra a Corona

Concentración de protesta por a visita. Foto: SEIRA

Concentración de protesta por a visita. Foto: SEIRA

A Princesa d’Asturias, Letizia Ortiz, ha visitau hue as instalacions d’o Centro Publico Integrau de Formación Profesional (CPIFP) Pirámide de Uesca. Ha estau alcompanyada por a presidenta d’Aragón, Luisa F. Rudi, a consellera d’Educación, Dolores Serrat, y por a secretaire d’Estau de Presupuestos y Gastos, Marta Fernández. O ministro d’Educación espanyol, José I. Wert, finalment no i ha acudiu como en primeras yera previsto.

A comitiva plegaba sobre as 11:30 h. d’o maitín. Han teniu una reunión con representants d’estudiants y profesors, y interpresaires, que dan a oportunidat de fer as practicas profesionals. Posteriorment han visitau qualques aulas, un taller y un laboratorio, amás d’o rocodromo exterior.

Dende o centro s’amostraban satisfeitos con a visita. Comentan que i ha habiu un intresant debat arredol d’a Formación Profesional en Aragón y en o propio centro, amás d’intresar-se por as actividatz cutianas en o mesmo.

Protestas debant d’a visita d’a Princesa

A leixanía d’o centro escolar dende o casco urbano de Uesca no ha empachau que unas docientas personas, seguntes informaba Arainfo, haigan acudiu t’o centro a protestar contra ista visita. A protesta yera convocada dende a Plataforma en defensa d’a escuela publica uescana, dende l’asamblea d’estudiants d’a Escuela Politecnica Superior de Uesca y sindicatos estudiantils. Os manifestants han lanzau consignas contra a Corona reyal espanyola y en defensa d’a educación publica.

Un fuerte dispositivo policial ha cusirau en tot momento a las manifestants, qui han considerau a presencia policial anguniant y desproporcionada. O Sindicato d’Estudiants Independentistas y Revolucionarias d’Aragón (SEIRA) ha denunciau l’actuación realizada por a Policía Nacional espanyola en o recinto d’a Escuela Politecnica Superior de Uesca a on, seguntes o sindicato, a policía secreta identificaba y rechistraba a estudiants dentro d’o campus. SEIRA demanda una explicación publica a la Universidat de Zaragoza y a o vicerrector d’o campus en permitir a entrada d’a policía en o campus universitario.

As manifestants han valurau positivament a concentración realizada.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.