VSF reculle sinyaturas ta rematar con a especulación alimentaria

A organización no gubernamental Veterinarios Sin Fronteras ha decidiu sumar-se a la replegada de sinyaturas de Make Finance Work ta pedir a os parlamentarios que voten en contra d'a especulación alimentaria, ye dicir, que voten en contra d'as esmiendas a o borrador o proximo 9 de chulio.

(Foto: Wikipedia)

O venient 9 de chulio o Parlamento Europeu, en a suya comisión d’Afers Economicos y Monetarios tiene en as suyas mans a decisión de continar permitindo as practicas especulativas con a birolla, u meter-les freno por meyo de l’emplego de ferramientas ta limitar as posicions especulativas.

Seis parlamentarios d’o estau espanyol fan parte d’a Comisión d’Afers Economicos y Monetarios. Ellos son Pablo Zalba, d’o Partiu Popular; Antolín Sánchez, d’o Partiu Socialista Obrero Espanyol; Ramon Tremosa de Convergència Democràtica de Catalunya. Y como suplents se troban Pilar del Castillo, d’o Partiu Popular y exministra d’Educación en o Gubierno d’Aznar; Salvador Garriga, d’o Partiu Popular; y Enrique Guerrero, d’o PSOE.
O borrador que se votará ista primera semana de chulio estió elaborau por o deputau alemán Markus Ferber, y a suya versión orichinal conteneba qualques interesants ferramientas ta frenar y limitar as posicións especulativas por parte d’os mercaus financiers. Lamentablement, o lobby financiero metió toda a suya maquinaria en funcionamiento y en o borrador s’han incorporau esmiendas que rebaixan tant considerablement ixas limitacions que, en a practica, significa que os mercaus pueden seguir operando con a birolla como dica agora. Mesmo o propio Feber presentó esmiendas a o suyo propio borrador.

As voces d’os grupos de presión financiers han plegau a os y as parlamentarias, agora se tracta que les pleguen as nuestras. Ye muit important que o comité d’economía d’o parlamento europeu refuse as esmiendas que s’adhibioron a o borrador inicial. Ta ixo VSF demanda a la chent que sinyen una petición que feran plegar a las personas miembros d’o estau espanyol dentro d’o comité. Ista ye una petición conchunta y coordinada d’a sociedat civil ta totz os países d’a UE. “Si somos capables de fer plegar prous sinyaturas o comité habrá de prener nota y asperemos que voten de traza correcta”, senyalan dende a organización.

Puetz sinyar ista petición aquí.

Fuent: http://veterinariossinfronteras.org/news/es_ES/2012/07/02/0001/9-de-julio-vota-no

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.