Walqa celebrará o suyo deceno cabo d’anyo con un completo programa d’actos

Se concentrarán mientres a semana d'o 12 t'o 18 de noviembre y bi incluye diversas actividatz endrezadas ta interpresas y t'o publico en cheneral, con una chornada de puertas pataleras o sabado 17.

Walqa (Foto: D.Ch.A.)

Walqa (Foto: D.Ch.A.)

O Parque Tecnolochico Walqa ha presto un completo programa d’actos ta celebrar mientres os venients diyas o suyo deceno cabo d’anyo. Totz se celebrarán en o complexo tecnolochico altoaragonés dependient d’o Departamento d’Industria y Innovación d’o Gubierno d’Aragón y se concentran principalment en a semana d’o 12 t’o 18 de noviembre.

Os actos prencipiarán o lunes 12 de noviembre con a charrada que ferá o consultor Ángel Medinilla sobre aspectos tecnicos y de chestión relacionaus con as metodolochías achils y a suya integración en a cultura corporativa, sesión ubierta y endrezada a todas as interpresas de Walqa y d’o entorno.

O martes 13 de noviembre o protagonismo será t’o Prochecto LIFE+ Zero -Hytechpark, con un seminario tamién ta interpresas y centros d’amostranza secundaria sobre como fer sostenible un parque tecnolochico fendo servir sistemas enercheticos basaus en o hidrocheno y as renovables. Será tamién o martes quan se faiga publico o ganador d’o concurso Fotowalqa.

O chueves 15 de noviembre se ferá a chornada central d’os actos d’o 10eno cabo d’anyo de Walqa en o edificio Felix d’Azara. A partir d’as 10:15 una mesa redonda contará bellas experiencias innovaderas mesas en marcha en Walqa por interpresas como Telefónica I+D, Marketing de PYMES, HdosO u Funidelia. Ista mesa dará paso a l’acto institucional a on que charrarán o president de Telefónica Espanya, Luis Miguel Gilpérez, o director cheneral d’ a Fundación COTEC, Juan Mulet y o president de  Walqa y Conseller d’Industria d’o Gubierno d’Aragón, Arturo Aliega, qui charrará d’os fitos alcanzaus por o parque dende que se fese a sociedat en noviembre de 2002. A chornada rematará con una foto de familia que achuntará a totz os treballadors d’as interpresas de Walqa en a retonda principal.

O viernes bi habrá una chornada de outdoor training t’os equipos directivos d’as interpresas de Walqa y o suyo entorno a on que os asistents podrán desembolicar habilidatz directivas y de treballo en equipo en actividatz a l’aire libre como tiro con arco u orientación.

O sabado 17 de noviembre Walqa s’amanará t’a ciudat de Uesca con una chornada de puerta pataleras t’o publico, que trobará proposas tan variadas como actividatz en a Fundación d’o Hidrocheno, visitas a l’Espacio Uesca 0.42, espardidura turisticam esporte d’aventura, exhibición d’automodelismo y actividatz d’a Policía Nacional. Qui quiera acudir-ie tendrán autobuses de baldes dende a gara intermodal de Uesca.

De 10 a 14, l’edificio Félix de Azara, tendrá un mercadet solidario a favor d’asociacions como la Asociación Espanyola contra o Cancer, Cadis, Cruz Blanca, Down, Atades, Enterachen Vols, Cáritas, Prodes, Voluntariau de Cruz Roja, u Conferencia San Vicente de Paúl. Todas ellas tendrán os suyos puestos y lo que consigan con a venda d’os articlos suyos y manufacturas será de raso t’os suyos fins beneficos y asistencials.

Ta rematar, o miercols 21 de noviembre se ferá a segunda edición de “Walqa dende amán”, endrezau ta l’alumnalla de Bachillerato de centros educativos d’a provincia de Uesca con l’obchetivo de dispertar vocacions scientificas entre os más chovens. Bi habrá charradas, y tallers de robotica, hidrocheno, astronomía y multimedia.

Fotowalqa 2012

A semana d’actos d’o 10eno cabo d’anyo servirá tamién ta fer conoixer o ganador d’o primer Premio de Fotografía Fotowalqa, destinau a distinquir os millors treballos realizaus con telefonos movils y, alavez, a promover a expresión artistica a traviés d’as nuevas tecnolochías.

O pasau domingo 21 d’octobre se zarraba o plazo ta inviar fotografía realizadas con telefonos movils y modificadas unicament con o software incluyiu en istos dispositivos. Se han recibiu más de 65 y as 25 millors serán expuestas mientres o mes de noviembre en o solero de l’edificio Félix d’Azara.

O churau, integrau por profesionals d’as dembas d’a comunicación audiovisual, imachen y fotografía examinará as fotografías recibidas y esleixirá o millor treballo, fallo que se ferá publico o 13 de noviembre de 2012. A imachen premiada pasará a estar parti d’a colección d’o Parque Tecnolochico Walqa y l’autor suyo recibirá un tablet.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.