Willy Meyer denuncia en Europa a politica de transporte escolar d’a D.Ch.A.

IU demanda que se suprima a mida que sacaría 25 linias de transporte escolar

Willy Meyer (Foto: IU)

Willy Meyer (Foto: IU)

Debant de l’anuncio d’a Consellería d’Educación d’o Gubierno Aragonés que sacará 25 linias de transporte escolar dando-le dreitament o servicio t’as interpresas privadas que ufren o transporte cutiano de pasachers, l’eurodiputau de IU, Willy Meter ha denunciau que “ista decisión antimás de violar una directiva europea sobre concesión d’achustes publicos, discrimina y fa más dificil l’acceso t’a educación”.

Encara que ista infracción puede suposar una pinyora con cargo a los fundos publicos d’Espanya, seguntes l’eurodiputau, “o Gubierno d’Aragón no se da por enterau y contina prebando d’imposar una decisión que as suyas conseqüencias van muito dillás d’una qüestión de buenas practicas en l’achuste publico y suposa un gran prechuicio t’o dreito t’a educación que ha feito que as autoridatz municipals y toda la comunidat educativa afectada refusen ista retallada”.

En ixa mesma linia, Adolfo Barrena, Coordinador cheneral de IU – Aragón, sinyaló que “deixar sin ruta de transporte escolar especifico, y levar a l’alumnalla en as linias regulars de transporte ye una autentica borrumbada, ya que os horarios d’istas linias, no son mica adaptaus t’os horarios escolars y se van a chenerar problemas d’escolarización porque, de cabo ta quan, l’alumnalla plegará tardi en o centro escolar, en atras ocasions habrá d’estar-se largo rato d’aspera y, a la finitiva, serán victimas d’istas ixautada”.

D’a mesma traza, Barrena ha remerau que “ista mida estió encetada por a Chunta de Castiella y Leyón y motivó un expedient de pinyora d’a Unión Europea ta l’Estau espanyol, feito que o Gubierno d’Aragón no’n fa caso de traza absurda y que puede fer que a la fin ista retallada inacceptable suposa mayor coste que o mantenimiento d’un servicio que cal.”

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.