Ya ye aquí l’agüerro (I)

Eduardo Lolumo

Ya ye aquí l'agüerro, y como no lo pareixe, talment por ixo istas linias levan un poquet de retardo. No fa olor de sulero mullau, ni bufa l'airera, y os jerseys continan bien alzaus en l'almario. Y por l'inte pareixe que qui quiera lucir a ropa de "entretiempo" habrá de asperar. Pero sí, ye agüerro dende as 11:05 d'o zaguer viernes 23 de setiembre en o qual se produció l'equinoccio d'agüerro, ye dicir, l'inte en que os rayos d'o sol cayen perpendicularment en ixa linia imachinaria que talla en dos metatz a Tierra: l'Ecuador.

En qualsiquier parte d'o mundo y arredol d'ixe diya ocurre una cosa curiosa: o diya dura o mesmo que a nueit. Nomás tornará a ser asinas en l'equinoccio de primavera, allá por o 21 de marzo. Dende agora a nueit irá vencendo, sin remeyo, a lo diya. Y ista curiosidat viene replegada en un par de mazadas. Son d'una mena que yo anomeno "astronomicos", porque a suya validez como afirmación scientifica no se puede refusar.

L'uno ye iste, en castellán: "Por San Mateo, tanto te veo, como no te veo". Sant Mateo se cilebra o 21 de setiembre. Paratz cuenta que a mazada no fa referencia nomás a lo diya de Sant Mateo, que tamién a las calendatas de más amán. Y ye que no siempre l'equinoccio d'agüerro ye o 21 de setiembre, ya que puede fer-lo entre lo 21 y lo 24. A qual causa la recenteramos más entabant. Manimenos a mazada ye eficaz porque en a epoca en que se creyó dengún remeraría a calendata d'o 21 de setiembre, pero de seguras que sabeba situar a fiesta d'un santo como Mateo, que amás de santo, estió apostol y evanchelista...

Y l’atra mazada…la dixamos ta finals d’a semana, que atra cosa no, pero agüerro ta recentar ditas y mazadas, encara en queda ta un rato.

Una rispuesta a Ya ye aquí l’agüerro (I)

  1. A minglana y as uvas, as millors fruitas de tot l’anyo!
    L’agüerro ye una d’as estacions más polius.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.