Yahoo! confirma que merca Tumblr por 856 millons d’euros y promete no “malmeter-la”

Con a operación, o portal de California quier esviellar o perfil d'usuarios y que puye o numer d'anunciants

David Karp, creyador de Tumblr (Foto: Wikipedia)

David Karp, creyador de Tumblr (Foto: Wikipedia)

O portal d’internet Yahoo! ha confirmau que ha plegau en un alcuerdo finitivo ta adquirir a web de microblogs Tumblr por 1.100 millons de dolars (856 millons d’euros), pagaus más que más tringo tringo, seguntes a companyía californiana, qui prometen no “pifiar-la con a operación”. “En virtut de l’alcuerdo y d’a nuestra promesa de no malmeter a interpresa, Tumblr funcionará de traza independient, como un negocio separau. David Karp continará estando lo conseller delegau. O producto, o servicio y a marca se continarán definindo y desembolicando de traza trestallada con o mesmo compromís, inchenio y irreverencia de Tumblr ta dar poders a los suyos creyadors”, se diz en un comunicau.

Yahoo! subraya que con más de trescientos millons de visitants mensuals y 120.000 subscripcions diyarias, Tumblr ye un d’os retes de meyos de comunicación que creix más rapido d’o mundo. Antimás  adhibe que se i cargan 900 apunts por segundo y que os usuarios i pasan 24.000 millons de minutos cada mes.

O portal asegura que a gran popularidat de Tumblr y o compromís d’os suyos creyadors, encargaus y publico de todas as edatz incorpora “una nueva y important comunidat d’usuarios en en o rete de Yahoo!”. A combinación de Tumblr y Yahoo! puyará previsiblement l’audiencia d’o portal en un 50%, dica más de 1.000 millons de visitants a o mes, y puyará o trafico un 20%.

T’a consellera delegada de Yahoo!, Marissa Mayer, Tumblr redefine actualment a expresión creyativa on line: “En muitos aspectos, Tumblr y Yahoo! no podrían estar más esferents, pero de vez no podrían estar más complementarios (…). As dos companyías son buens puestos t’as marcas, establidas y emerchents. Y, más que más, Tumblr y Yahoo! tienen muito a viyer quanto a usuarios, disenyo y busca d’a sorpresa y a inspiración en o mell meyo d’a cotidianidat”. Yahoo! i ganará millons d’usuarios chovens y más volumen d’anunciants.

D’atra man o conseller delegau de Tumblr, David Karp, de vintiseis anyadas, ha asegurau a la suya comunidat d’usuarios que ni o suyo equipo ni a suya fuella de ruta no cambiarán con a operación, como tampoco no la suya misión de dar opcions a los creyadors ta que faigan a suya millor faina y la presenten ta l’audiencia que se mereixen: “Somos muitismo contentos de tener o refirme de Yahoo! y d’o equipo suyo, que comparten o nuestro suenio de fer d’internet o marco creyativo final”.

 

Fuent: http://www.vilaweb.cat/noticia/4116875/20130520/yahoo-confirma-compra-tumblr-856-milions-deuros-promet-espifiar.html?utm_source=feedly

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.