Yanukovich anuncia eleccions abanzadas pa aturar a violencia

O president acuerda con a oposición cambios en a constitución y un gubierno d'unidat nacional

Imachen d'archivo de disturbios en Kiev. Foto: Msytslav Chernov (CC-BY-SA)

Imachen d’archivo de disturbios en Kiev. Foto: Msytslav Chernov (CC-BY-SA)

O president ucrainiano, Víktor Yanukovich, ha anunciau a convocatoria d’eleccions abanzadas. Ye un d’os compromisos a que ha plegau con os opositors ta aturar a violencia en o país que ha deixau istas zagueras horas decenas de muertos. Seguntes a BBC, Yanukovich ha alcordau a formación d’un gubierno d’unidat nacional y s’ha comprometiu a aplicar cambeos constitucionals ta reducir o poder d’o president. Istos alcuerdos han plegau dimpués de toda una nueit de negociación, con a mediación d’os ministros d’Afers Extranchers d’a UE.

Sancions

A Unión Europea sopesaba si aplicar un embargo d’armas y sancions economicas y de mobilidat en Ucraína, seguntes o esbruixallo d’as conclusions d’a reunión extraordinaria que fan os ministros d’Afers Extranchers d’os vintiueito en Bruselas. Tot y que o texto encara no s’ha zarrau, o esbruixallo menciona a retirada de visaus, a conchelación d’activos financiers, a introducción d’un embargo d’armas y a suspensión d’as licencias d’exportación d’equipamientos que podrían emplegar-se t’a represión interna en Ucraína. O texto tamién exiche a fin decamín d’a violencia y acusa a o president ucrainiano Víktor Yanukovich d’estar o prencipal responsable d’a situación actual.

‘Parando cuenta en o deterioro d’a situación, a Unión Europea ha decidiu, de traza urchent, d’introducir midas, incluida a privación de visaus y a conchelación d’activos, contra os responsables d’a violación d’os dreitos humanos, a violencia y l’uso excesivo d’a fuerza’, diz o esbruixallo que se filtró a la prensa.

En o texto, os ministros d’Afers Extranchers condenan a violencia y recuerdan que o president ucrainiano habría de fer o primer trango ta ubrir o dialogo con a oposición y acabar os enfrontinamientos.

As conclusions, encara pendients d’aprebación, remarcan que s’han de respectar os dreitos humanos y as libertatz fundamentals en Ucraína, y demandan una investigación urchent y independient sobre posibles violacions d’os dreitos humanos.

Fuent: http://www.vilaweb.cat/noticia/4174754/20140221/ianukovitx-anuncia-eleccions-avancades-aturar-violencia.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.