Zaragoza acullirá a entrega d’os premios Porc d’Or a la excelencia en a producción porcina

En a trobada, o venient 22 de noviembre, se conoixerán as torres que ganarán os premios que reconoixen a fayena d'un d'os sectors más dinamicos d'a economía aragonesa.

Imachen: Gubierno d'Aragón

Imachen: Gubierno d’Aragón

A ciudat de Zaragoza s’ha trigau, por primer vegada en as vinte anyadas d’historia d’os premios Porc d’Or, como siede ta celebrar a gala d’entrega d’istos prestichiosos premios. En a suya triga han pesau criterios relacionaus con a suya accesibilidat, infraestructuras y ufierta turistica, encara que tamién ha pesau o feito de que Aragón ye a segunda comunidat autonoma en importancia cuanto a lo sector d’o tocín, seguntes ha explicau lo Gubierno d’Aragón. Por un regular, o premio s’entregaba en Leida.

Aragón conta con quasi 5.500.000 tocins y produz siet vegadas más carne de tocín que lo que minchan os suyos habitadors, lo que fa que siga un país exportador, existindo antimás una creixient demanda tanto en Europa como en atros países. En a zaguer decada, seguntes cifras d’o gubierno, Aragón ha experimentau o mayor porcentache de creiximiento en producción de tocín entre os territorios europeus productors. Antimás, en o sector treballan más de 10.000 personas.

En ista XX edición d’os premios Porc d’Or (Tocín d’oro), bi ha 86 torres que pueden ser premiadas en as 122 nominacions con as estatuetas d’oro, plata y bronce. Os premios estioron creyaus por L’Institut de Recerca y Tecnologia Agroalimentàries en 1994 con a enchaquia de reconoixer o treballo d’as interpresa y explotacions de tocins que, “gracias a la suya profesionalidat y esfuerzo, y a l’emplego d’as millors tecnicas de producción, son capables de superar os nuevos retos que de contino apareixen en o desembolique d’ista actividat”.

 

Una rispuesta a Zaragoza acullirá a entrega d’os premios Porc d’Or a la excelencia en a producción porcina

  1. Chusé raúl usón

    Amigos, ‘premio a la excelencia en’, no pas ‘t’a excelencia en’. Millor ‘grancha’ que ‘torre’; millor ‘latón’, que ‘tocín’. Enhorabuena per lo vuestro treballo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.