Zaragoza celebra o IV Congreso de Fisiolochía organizau por l’alumnau d’a Facultat de Medicina d’a Universidat de Zaragoza

Iste congreso se celebrará o 10 y 11 de mayo en Zaragoza y ye feito por estudiants y ta estudiants

cuartocongresofisiologiaO Congreso de Fisiolochía ye un prochecto que prencipió en 2010. Una iniciativa quitada entabant por o departamento de Fisiolochía y Farmacolochía d’a Facultat de Medicina d’a Universidat de Zaragoza. Empecipió como una ideya, que gracias a l’esfuerzo conchunto de profesors d’o departamento y estudiants de 2º se fació con muita delera. Cada anyo se va aprendendo mas, s’amuestra un mayor compromís por parte d’alumnos y profesors y se va amillorando respective a las edicions anteriors. O IV Congreso de Fisiolochía d’a Facultat de Medicina d’a Universidat de Zaragoza ye una iniciativa angluciosa, pero realizable y beneficiosa ta totz y todas.

Iste Congreso marca un fito en a historia d’a facultat, estando o primer congreso feito ta estudiants y por estudiants. Ista ye una oportunidat inigualable, en a quala l’estudiant puede tener a oportunidat de realizar un treballo d’investigación, que iste siga publicau y de poder realizar una ponencia debant d’un publico d’unas 300 personas intresadas en o campo d’a Medicina.

Os y as estudiants de hue son os futuros profesionals d’o maitín, tanto asistencials como investigadors. Os temas por os quals se veyen intresaus hue en día, serán os que ocupen os suyos estudios y o suyo treballo en o futuro. En edicions anteriors d’o congreso se replegoron treballos de revisión bibliografica, sobre temas biomedicos d’actualidat. Se tractoron entre muitos atros a revolución cibernetica, a cheneración de dispositivos artificials, a posibilidat de recheneración de miembros prenendo como modelos qualques especies d’anfibios u nuevos estudios sobre l’enviellimiento fisiolochico.

As anteriors edicions d’o Congreso contoron con a colaboración de profesionals de reconoixiu prestichio en a investigación biomedica como a Doctora Ana Losada (directora d’o grupo de Dinamica Cromosomica en o Centro d’Investigacions Oncolochicas-CNIO de Madrit), o Profesor Paulino Gómez-Puertas (scientifico titular d’o CSIC y que diriche o Grupo de Modelau Molecular en o Centro de Biolochía Molecular “Severo Ochoa” de Madrit), Fausto García Hegardt (Catedratico Emerito de Bioquimica y Biolochía Molecular d’a Facultat de Farmacia d’a Universidat de Barcelona) u Ethel Queralt Badía (Investigadora Prencipal d’o Grupo de Ciclo Celular d’o Programa d’Epichenetica y Biolochía d’o Cancer (PEBC) de l’Instituto d’Investigacions Biomedicas de Bellvitge-IDIBELL, Barcelona).

Fuent: http://arainfo.org/2013/05/zaragoza-celebra-el-iv-congreso-de-fisiologia-organizado-por-el-alumnado-de-la-facultad-de-medicina-de-la-universidad-de-zaragoza/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.