Zaragoza contina creixendo y os lugars espoblando-se, seguntes l’INE

O mundo rural contina perdendo población entre que as prencipals ciudatz d'o país continan creixendo

Ilesia de Morillo de Galligo, un d'os lugars que creix (Foto: Wikipedia)

Ilesia de Morillo de Galligo, un d'os lugars que creix (Foto: Wikipedia)

O Instituto Nacional d’Estadística ha feito publicos os datos d’as Cifras Oficials de población. En o tocant a Aragón, os datos deixan un paisache de lugars espoblando-se entre que Zaragoza y atras ciudatz continan creixendo.

En total, o país ha creixiu en a suya población. Dende o 1 de chiner de 2000 dica l’uno de chiner de 2011, Aragón pasó de tener 1.189.909 habitandors a tener-ne 1.346.293, una puyada de  156.384. A más gran parti se centroron en as poblacions de más de 2000 habitadors. En as localidatz ‘meyanas’, d’entre 2000 y 10.000 habitadors, o creiximiento estió de 62.006 personas. As quatre ciudatz que más creixioron estioron Zaragoza, Uesca, Teruel y Alcanyiz que sumoron un total de 117.519 empadronaus más.

Os lugars chicorrons de entre 101 y 2000 habitadors estioron os que más población perdioron; quasi 24.000 habitadors. Manimenos os más chicorrons de totz, os de 100 u menos personas censadas puyoron a suya población en 779 personas.

Quatre lugars cambioron de categoría, en blincar os 2000 habitadors: L’Aínsa, Benás, Alfacharín y O Burgo d’Ebro. Atros quatre lugars creboron con as tendencias y puyoron a suya población en un 10% debiu a lo turismo d’aventura: Ardisa, Morillo de Galligo, Biscarrués y Santolaria de Galligo, totz quatre en a redolada d’a Galliguera.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.