Zaragoza mete en chaque a la “mafia”

Una manifestación demandó ahiere en Zaragoza un cambeo de sistema. En Madrit se realizó una protesta contra a monarquía espanyola

Zaragoza.- Una gran tela de colors representando a las mareas. Foto: Andrea

Zaragoza.- Una gran tela de colors representando a las mareas. Foto: Andrea

Cients de personas, 32 colectivos politicos y socials, salioron ahiere a las carreras d’a capital aragonesa pa exichir un cambeo de sistema y amostrar o suyo abosluto refuse a la “mafia” politica y financiera.

Representants d’os colectivos convocants inciden en “seguir luitando por un sistema democratico real, chusto y equitativo, en o qual as personas siamos personas y no simples numers u simples expedients con os que una minoría de privilechiaus obtenga esquimens”.

En iste sentiu, a ciudadanalla aragonesa tornó a reclamar que a chusticia “faiga o suyo treballo y meta en chaque a os culpables”, en relación a os numerosos casos de corrupción y a l’ataque directo a os dreitos humanos materializaus con os innombrables retalles socials.

Mientres o recorriu se podioron veyer representadas distintas luitas. Pancartas con lemas como “En mans d’a Troika y de corruptos. Gubierno dimisión”, “Por o dreito a la vivienda. Stop Desafiuzamientos”, “Ni retalles ni despius. Treballadors d’AUZ-TUZSA”, amás de diversas banderas y una gran tela con as colors de todas as mareas ciudadanas.

Cal destacar a ‘columna blanca‘ que partió una hora antes dende o vico de Sant Chusé pa unir-se a las 19.00 horas con a resta de manifestants. En iste bloque yeran representadas Marea Blanca, Plataforma contra a privatización d’a Sanidat, l’asociación vecinal de Sant Chusé y o 15M Sant Chusé con un mensache claro, a esfensa d’o Centro d’Especialidatz Pablo Remacha.

Multitudinario ‘Chaque a o Rei’ en Madrit

A manifestación de Zaragoza yera sincronizada con as protestas que se realizoron en a tarde d’ahiere en bellas ciudatz.

En Madrit mils de personas secundoron a convocatoria d’a Coordinadera 25S baixo o lema ‘Chaque a o Rei’. A manifestación transcorrió animada y de forma pacifica entre tot o recorriu, manimenos o fuerte dispositivo policial, as incontables retencions y identificacions, o malestar por l’impedimento de concluir en o puesto previsto, a plaza d’Orient, y por as noticias d’a privación d’o Gubierno d’o PP a la Oficina d’a Organización pa la Seguridat y a Cooperación en Europa (OSCE) d’a supervisión y observación d’a protesta.

A Coordinadera 25S presentó ahiere una denuncia “por vulneración de Dreitos Fundamentalspor l’operativo policial, organizau dende Delegación de Gubierno en Madrit, que viedó a os y as manifestants a entrada en a plaza d’Orient, puesto a on yera previsto o final d’a manifestación. Ista Coordinadera recuerda que dita plaza “no tien estatus especial que empache protestas pacificas”.

A OSCE “decepcionada” con a decisión d’o Gubierno d’o PP

Antiparte, l’ambaixador Janez Lenarčič, Director d’a Oficina d’a OSCE pa las Institucions Democraticas y Dreitos Humanos (OIDDH), expresó ahiere a suya decepción dimpués d’a notificación d’as autoridatz espanyolas que os monitors d’a Oficina no serían bienvenius en a manifestación contra a monarquía en Madrit.

“Igual que totz os Estaus participants d’a OSCE, Espanya s’ha comprometiu a guaranciar a libertat de reunión pacifica, y o treballo d’os monitors ye fundamental pa guarenciar que ixa libertat ye guaranciada”, dició Lenarčič. “A nuestra oficina ha disfrutau tradicionalment d’una buena cooperación con Espanya, por o que iste cambeo ye sorprendent”.

En mayo, as autoridatz espanyolas se comprometioron a cooperar plenament con o monitoreu conchunto d’a OIDDH. Ahiere de tardes, manimenos, a Oficina recibió a notificación de cambeo d’actitut d’as autoridatz.

“A oposición repentina por parte d’as autoridatz espanyolas planteya preocupacions sobre as suyas intencions maitín”, dició Lenarčič. ”Femos un clamamiento a las autoridatz pa guaranciar o pleno respecto d’a libertat de reunión pacifica, d’alcuerdo con compromisos d’a OSCE y atras normas internacionals de dreitos humanos”.

Fuent: http://arainfo.org/2013/09/zaragoza-pone-en-jaque-a-la-mafia/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.