Zaragoza se suma a la mobilización global d’o 12M

“Primero son as personas. Saldremos t'a carrera, unius, ta esfender os servicios publicos”.

Imachen d'a rueda de prensa d'o lunes. (Foto: Arainfo)

“Bi ha un gubierno que no nos ascuita, que no da a cara quan prene as decisions por nusatros. Dicimos no a una austeridat imposada por o PP (y antes por o PSOE)”. Asinas de claro s’expresaba iste lunes Víctor Reloba, actual president d’o Consello d’a Choventut de Zaragoza, y vocero en a rueda de prensa d’as personas y organizacions convocants d’a manifestación d’o proximo 12M.

“Primero son as personas. Saldremos t’a carrera, unius, ta esfender os servicios publicos”, expresaba Víctor, incidindo en as qüestions que unen a colectivos variopintos como as asambleyas de vicos d’o 15M, Democracia Real Ya, Mareas roya y verda, Ecolochistas en Acción u Adicae, entre atros. As reivindicacions, en ista ocasión, s’han concretau en 5 puntos a modo de “plan de rescate ciudadano”, encara que en definitiva, “imos a dicir no a un capitalismo que ha sacau totz os dreitos a la ciudadanía”.

Entre toda a semana, se succederán as actividatz “en esfensa de l’amostranza y sanidat publica, gratuitas y de calidat, contra los retalles y as privatizacions, por un reparto chusto d’o treballo, contra a precariedat u a chubilación a os 67 anyos, por a retirada de la reforma laboral, por una vivienda digna, por una reforma fiscal que redistribuiga a riqueza, por una renta basica universal y contra o rescate a os bancos”, en parolas de Víctor.

En a rueda de prensa intervinió tamién Andrea Gimeno, que ha detallau todas as citas previstas ta istes días, en as quals i habrá dende concentracions por a libertat d’as detenidas por a Vada Cheneral d’o 29M a trobadas d’asambleyas, de representacions teatrals por os retalles en as aulas a columnas dende os vicos a la manifestación, de foros ciudadanos en a Plaza d’o Pilar a tallers formativos sobre a deuda u as libertatz civils.

Entre os zaguers meses, dimpués d’as acampadas “i hai habiu una descentralización d’o 15M, que ha permitiu plegar a mas chent, en os vicos”, destacaba Víctor, a o que adhibiba Marta de Democracia Real Ya que “hemos amanau, de nuevo, a politica a la ciudadanía”. En ixe sentiu, Víctor incidiba que “nos somos transformando en un prochecto de resistencia y mobilización”.

Tamién Ana Solana, vicepresidenta de AICAR-ADICAE sinyaló a necesidat d’una “paralización d’os embargos y una reforma d’a lei hipotecaria”, como midas que aseguren o dreito a una vivienda digna.

Sobran as razons. En todas as intervencions s’ha sentiu l’entusiasmo enta una chornada historica, que contará con manifestacions en os cinco continents y en cientos de ciudatz, que se van sumando cada día. “Dende Estaus Unius a Alemanya, Australia,… y mas que se i sumarán, sobre tot ista semana”, celebraba Marta.

Respective a la posibilidat que se repitan as acampadas d’o pasau anyo, Víctor ha apuntau que “una vez desconvocada a manifestación, cadagún será libre de fer o que quiera”. Y Marta recordaba que “as acampadas nunca no han estau convocadas por dengún”.

Fuent: http://arainfo.org/2012/05/zaragoza-se-suma-a-la-movilizacion-global-del-12m/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.