Zaragoza y Uesca contra la reforma laboral d’o gubierno espanyol

Milars d’aragoneses han recorriu hue o centro de Zaragoza y Uesca en rispuesta a la crida d’UGT y CCOO ta manifestar-se contra a recient reforma laboral aprebada por o gubierno espanyol de Mariano Rajoy.  En Zaragoza, dimpués d’a pancarta con o lema “No a la reforma laboral por inchusta con os treballadors, ineficaz t’a economía, inutil ta l’ature”, amás d’os secretarios chenerals en Aragón d’UGT, Julián Lóriz, y CCOO, Julián Buey, se trobaban o vocero d’o PSOE en as Cortes, Javier Sada, y atros deputaus d’o suyo grupo, totz os parlamentarios autonomicos y concellers de CHA, o deputau en o Congreso d’a Cucha d’Aragón, Chesús Yuste, y representants institucionals y cargos de IU.

Dezaga d’a convocatoria oficial s’ha manifestau tamién o bloque critico, que protestaban contra la reforma laboral, pero tamién contra l’actuación d’os sindicatos mayoritarios. En iste bloque bi’n heba ripresentants d’atros sindicatos y colectivos, como o 15-M, a marea verda por l’amostranza publica, o Bloque Independentista de Cuchas u asambleyas de vico d’a ciudat.

En Uesca quasi 2.000 personas han participau en a manifestación que s’ha dirichiu dende a Plaza de Navarra dica a subdelegación d’o Gubierno espanyol, an que os liders sindicals en Uesca d’UGT, Luis Cavero, y CCOO, Begoña Cavero, han leyiu os suyos respectivos manifiestos.

Cinquanta miembros d’o Movimiento 15-M s’han adhibiu a la protesta con a pancarta No somos mercadería en mans d’os politicos, y tamién s’han deixau veyer numerosos socialistas, entre ells o ex-secretario d’Estau d’Infrastructuras y deputau en o Congreso espanyol, Víctor Morlán, l’ex-alcalde Fernando Elboj y atros miembros de CHA y IU.

En declaracions a os meyos antes d’encetar la marcha, Julián Lóriz ha reiterau a suya opinión que ista ye a mayor agresión laboral d’a democracia “contra os treballadors, os chovens, que se van a convertir en l’oscuro obchecto de deseyo d’os cazasubvencions u os aturaus”.  O lider d’UGT ha quiesto resaltar que con a manifestación de hue prencipia una gran mobilización que va a ir de menos a mas, agrupando fuerzas y en luita ta dicir-le a Rajoy que no puede estafar a la ciudadanía y que va a trobar a os treballadors debant.

Julián Buey tamién considera ista reforma una agresión sin “precedents que ubre as puertas a o despido libre, que mete en man d’os interpresarios instrumentos ta maniar a o suyo arbitrio as interpresas sin garra tipo de control por parte d’os emplegaus, que se carga a negociación colectiva y que suposa una desregulación d’o mercau laboral y as suyas normas.”

Deja un comentario

Tu dirección de correo electrónico no será publicada. Los campos necesarios están marcados *

Connect with Facebook

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.