Zimbabue en o camín d’a “devolucion” y d’o multilingüismo oficial aintro d’a nueva constitución

Se tracta d’un texto que da l’estatuto oficial a deciséis luengas y que estableixe diez asambleas rechionals con poders lechislativos. Se preveye un referendum en marzo

zimbabue

Foto: http://www.flickr.com/photos/routard05/

Zimbabue ye en o camín d’o referendum d’a suya nueva Constitución ent’o cabo de marzo, seguntes informacions conoixidas o miercols pasau por qualques medios africanos, y seguntes o que publicaba Nationalia.

A constitución, o Comité Parlamentario Constitucional (COPAC) la ha redactada y la ha levada t’o Parlamento zimbabués a semana pasada. Os lechisladors pueden introducir encara esmiendas antes que o texto siga aprebau por o pueblo en referendum.

Tal como ye agora, o texto introduce cambeos bien importants aintro de l’Estau zimbabués. O país africano creyará diez asambleas rechionals, que en primeras serán responsables d’o “desembolique social y economico” d’as suyas provincias respectivas. Con tot y con ixo, una d’as nuevas midas constitucionals diz que ixas asambleas pueden asumir competencias lechislativas (una “devolución”, seguntes a tradición politica anglosaxona) si o Parlamento de Zimbabue les transfiere os poders correspondients.

O texto provisional preba tamién d’establir un estau oficialment multilingüe. L’articlo 6 diz que Zimbabue tendrá deciséis luengas oficials, que son l’anglés, o chewa, o chibarwe, o kalanga, o koisan, o nambya, o ndau, o ndebele, o shangani, o shona, a luenga d’os signos (sin especificar quála), o sotho, o tonga, o tswana, o venda y o xhosa. Permite tamién que o Parlamento dé l’estatuto d’oficial belatra luenga en l’esvenidero, y obliga tamién a l’estau a “asegurar que todas as luengas oficials sigan tractadas con igualdat”, mesmo de prener “en consideración as preferencias lingüisticas d’as personas afectadas por midas u por comunicacions gubernamentals”.

Ta que totz ixos prencipios se mantengan, cal que os dos prencipals partius zimbabueses (o ZANU-PF d’o president Robert Mugabe y o MDC d’o primer ministro Morgan Tsvangirai) refirmen os cambeos y que no los eliminen d’o texto constitucional antes d’o referendum.

Entre as conversacions d’o proceso constitucional, o MDC ha amostrau que da mas refirme ta transferir competencias a las provincias que o ZANU-PF, ya que iste zaguer partiu, mandau por Mugabe, ye feito a una traza centralista de gubernar. A pregunta autonomica causó qualques pleitos entre totz dos partius, mesmo o mes pasau.

A población de Zimbabue ye etnicament mixta. A mayoría perteneixe a o grupo shona, pero i hai tamién un important grupo ndebele aintro d’as provincias occidentals. Dillá i hai atros pueblos orichinarios y os zimbabueses d’orichen europeu.

Fuent: http://www.jornalet.com/nova/1431/zimbabwe-sus-la-dralha-de-la-devolucion-e-del-multilinguisme-oficial-dins-la-nova-constitu

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.